加斯居尼前日代表波導戰鬥踢表演賽，踢完俾波導高層彈到一戙都無，試腳失敗。據小道消息講，「加薩」體能差只係被拒諸門外嘅其中原因，最衰係佢俾人踢爆試腳前嗰朝早重死去飲酒，講到尾都係酒精累事，「加薩」自己唔生性。
以下係一位波導高層賽後對「加薩」嘅評價：「佢體能太曳，傳球表現又令人不敢恭維，我哋用人係睇能力唔係講名氣，所以一定唔簽佢。」其實令波導高層最嬲，係有人見到「加薩」酒癮大發，滿身酒氣，換轉你係波導高層都耍手擰頭啦。呢位昔日球星個名已經臭晒，一日唔戒酒都唔使旨意有班落。
曼城前日吞紐卡素雙蛋，領隊基瑾賽後大讚平了英超最快入球紀錄（十秒）嘅對方前鋒舒利亞，話睇老舒呢個入球同埋成場表現就已經值一千五百萬鎊啦。我求大俠諗番轉頭，當年就係基瑾簽舒利亞入紐卡素喎，佢咁講即係話畀大家聽佢當年無入錯貨，有眼光啫，呢個老江湖真係曉轉個彎攞彩。
講開紐記對曼城，拿殊趁舒米高傷咗至有機會正選落場，幫曼城把關。好衰唔衰，佢開波十秒就送禮畀紐卡素，解圍省中舒利亞，最後俾人射入空門。呢球波之後拿殊其實表現唔差，但好嘢唔慌會有人記得。睇怕佢響曼城前途都唔慌好。話時話，好彩佢唔係踢利物浦，如果唔係以侯利亞性格，重唔即刻賣走拿殊至奇。
紅軍利物浦前晚終於一洗之前十一場波嘅不勝頹風，前晚憑希斯基一個入波砌低之前當旺嘅修咸頓。如果唔係修咸頓龍門尼美成場波左撲右撲，救出好幾個必入球，加埋奧雲缺態，紅軍呢場波點止贏得一球咁少？呢場波賽前好多人話係五五波，本報波經版名家吾中就響幾乎完全無數據支持下貼中紅軍，算有眼光啩？
前晚半夜三點幾，美國嗰邊的NBA網站開始有拓荒者主將華萊士被罰停賽七場嘅消息，當時好多外國賭波網站同啲艇仔都走漏眼，惟獨梳打埠莊家最醒，第一時間將拓荒者對木狼場波封盤，結果當然開下盤。我求大俠相信梳打埠莊家唔係反應夠快，隨時會被人煲起！