我大口羅拉覺得呢個世界真係好鬼現實，藝人唔紅就難免俾人一沉百踩，好似近年事業跌落谷底嘅美國過氣流行音樂天王米高積遜（MichaelJackson），就成為全球嘲笑嘅對象，連美國好有代表性嘅NBC電視台，都決定搞一個三個鐘頭嘅特輯，講吓米高嘅事業同個樣𠵱家有幾衰喎！
呢個叫做《MichaelJacksonUnmasked》嘅節目，顧名思義係要揭開米高嘅面紗。電視台會將初出道嘅黑人小米高，逐漸「演變」成𠵱家白皮膚走樣米高嘅過程，作為佢事業起跌嘅「里程碑」。節目唔單止會訪問幫米高做整容手術嘅醫生，重會搵一啲好熟識米高嘅二五仔爆料，雖然節目要喺下個月十七號先出街，但聽落已經好吸引。
不過，身為主角嘅米高就一定唔多高興，米高嘅發言人話：「我覺得電視台攞米高塊面做特輯，係一件好恐怖嘅事，佢哋應該專注其他世界大事！」事實上連米高自己亦知道自己嘅事業好唔掂，所以佢打算搵番四個阿哥重組Jackson5齊齊搵食，希望東山再起啦！