有人話大講珠三角融合嘅施政報告，捧紅咗香港珠三角基金會，不過八方前兩日見到基金會執行總監Simon葉松茂，佢就話特首做得好唔夠。
呢個基金會舊年由DHL主席鍾普洋成立，施政報告出爐前，Simon已經猛咁向阿董哋獻計，點知一睇份施政報告，仍然乜嘢實質內容都欠奉。原來Simon向政府建議，喺舊機場跑道搞「珠三角博覽會」。
按Simon設想，呢個為期一年嘅博覽會，籌備時間需要十八個月，○四年開幕後，可以為香港創造一萬個就業機會，好過大笪地多多聲。場館主要分三類，一類以行業為本位，一類以城市為本位，吸引珠三角商家同政府來港設館推廣，重有一類場館專為外國商家而設。
據說特首佢哋當時聽完，反應係「可以接受」，不過之後冇晒下文。八方就覺得好正常，呢個係阿董嘅一貫風格。
傳真︰2623-9278
電郵︰