最近，德國平治車廠公布咗去年嘅銷售總成績，截至去年底該廠共售出約1,110,300部私家車，雖較2001年嘅1,113,500部為少，但走勢依然強勁；若以單一市場計算，平治響西歐地區共售出720,300部新車，而美國則上升超過3%（達213,200部），而亞洲地區亦售出約86,500部新車，而當中41,000部更係賣到日本㖭！除此之外，平治喺泰國嘅銷量亦上升高達48%，達4,300部，而南韓地區嘅銷量亦上升128%（達2,800部），中國嘅銷量亦錄得約26%嘅升幅。
另外，若以單一車型計算，平治E-Class及S-Class仍然係該廠嘅熱賣車款之一，尤其當E-Class喺去年推出新一代型號後，成績更見突出；而走迷你小車路線嘅Smart，銷量亦由2001年嘅116,200部，上升至去年嘅122,300部，升幅超過5%。至於走豪華房車路線嘅Maybach，自喺去年於美國紐約正式登場後，亦經已接到超過1,000張定單，從而可見平治汽車響各地嘅銷量，絕對可以用走勢強勁來形容呢！