幾位讀者來電郵，要求左丁山盡快搵阿桂者（岑寶桂）及傅會長（研易學會）指點羊年大趨勢，等佢哋心裏有個底。其實呢兩位高人唔係咁易搵得到，兼且佢哋唔鍾意出風頭，請大家畀啲耐性左丁山至得。一位讀者來電郵問：「李天命先生的流年運程書在哪裏可以買得到？」吓，唔係呀，李天命的確係哲學高人，但佢寫嘅係思考藝術書，從來冇聽過佢有寫流年運程，呢位讀者大概搞錯咗名。
暫時未知高人對羊年嘅睇法，於是問八卦邱，八卦邱話佢𠵱家鍾意做志願機構義工，好忙，唔得閒研究住，教左丁山搵羊年立春日嘅八字，再查吓《窮通寶鑑》，實行無師自通，於是照足佢吩咐，搵到如下嘅一番理解：
二月四日年初四下午二時零六分，乃係立春時辰，即係癸未年甲寅月戊申日己未時，八字之中，有兩木四土一水一金，欠火。未屬羊，日係戊申，戊是土，可以講羊年之羊乃係土羊，應該生性比較馴服，可惜立春係土日而五行欠火，而火生土，冇火又點可以生土呢，即使土多（共四土），亦恐無以為繼。睇《窮通寶鑑》書云：「三春戊土，無丙照暖，戊土不生；無甲疏劈，戊土不靈；無癸滋潤，萬物不長」，現在立春有甲木有癸水，偏偏冇丙火，故此：「正二月即有甲癸，若無丙除寒，如萬物生而不長，故無丙者，富貴艱辛！」好彩正月係寅月，寅內藏丙火，即使力度不足，亦有些微作用。總括而言，羊年自二月四日開始，唔會曳過馬年，只係要好勤力去捱至得。