張學友前晚舉行的演唱會，因沒有向觀眾表明唱最後一首歌，完場後觀眾鼓譟不肯離開兼踏地，而學友唱《分手總要在雨天》時更一度忘記歌詞，要觀眾提水。
張學友前晚在紅館展開一連十二場的「張學友音樂之旅壓軸篇演唱會」，學友總共換了五套衫，服裝全部度身訂做，學友經理人陳淑芬透露服裝花費達數十萬。在開場時學友獻唱了不少新歌和英文歌，台下觀眾反應較冷淡，但當唱到大家耳熟能詳的舊歌時，觀眾就轉為熱情。
學友連唱了兩隻快歌《頭髮亂了》和《餓狼傳說》，在一輪勁歌熱舞後學友索晒氣，同觀眾講要「唞吓先」，有觀眾大嗌學友「好勁」，現年四十一歲的學友即說：「你哋知我都幾十勾啦！」而當學友唱《分手總要在雨天》時竟一度忘記歌詞，要觀眾提水，學友於是重新再唱一次，而他在唱《李香蘭》時又差點在樓梯跌倒。
學友在唱完最後一首歌入後台後，觀眾仍不捨得離開，以為有安哥，但見學友久久不出來，有人鼓譟並大力踏地，最後仍不見學友出場，觀眾惟有陸續離去。
事後學友接受訪問時表示自己十時許已開始安哥，總共安哥了十二首作品，可能觀眾不知情，他笑說：「知道觀眾鼓譟時，我已經着住浴袍同拖鞋，唔通再出嚟唱咩，可能我冇交代係最後一首歌，聽晚我會講㗎嘞。」學友亦直認忘記歌詞，他說：「因為之前喺內地多數唱國語版，所以唔記得歌詞，換轉以前我會好嬲，但𠵱家學識咗原諒自己，等自己開心啲。」
問他女兒和太太羅美薇為何不來捧場，學友說：「個女夜晚要瞓覺，我老婆要照顧佢，我老婆已經唔係我嘅fans，係我個女嘅fans。」
採訪：駱華齡
攝影：林德雄
