出年嘅立法會選舉戰幔尚未拉開，噚日兩位可能循法律界功能組別出線嘅人選，不約而同引用金庸武俠小說招式，提早為來年嘅選戰隔空過招。
吳靄儀出名係金庸迷，噚日立法會最後一日辯論施政報告，佢喺演詞內用《射鵰英雄傳》中洪七公傳授郭靖嘅一招「亢龍有悔」，話葉劉淑儀冇新意。但佢將「亢」字讀成「升降機」嘅「降」，有心水清嘅記者提醒吳靄儀，應該係「降龍十八掌」中嘅第一招「亢龍有悔」。吳靄儀一知搞錯即刻認衰，重拿拿臨送咗自己本評論金庸小說嘅大作畀呢位記者，不過佢堅持「降」字讀音冇錯，重引經據典講到《易經》，話「升降」嘅「降」先係正音。
另一邊廂，港進聯主席劉漢銓同記者閒談，話來年立法會選舉，考慮棄選舉委員會組別，轉戰法律界功能組別。吳靄儀喺法律界組別咁多飛，劉主席擔唔擔心呢？佢話有時歷史都可以改寫，重話自己識「凌波微步」，即係金庸小說《天龍八部》男主角段譽嘅絕招，用嚟應付傳媒最啱使。未選就諗住撇甩傳媒，劉主席，你咁都得？
傳真︰2623-9278
電郵︰