公關靚女阿美到年尾諗起啲老友，搵電腦Ｊ、作家C食番餐飯，左丁山掹電腦Ｊ衫尾，一齊坐的士去到銅鑼灣富豪酒店三十一樓食其意大利餐。好耐冇去過銅鑼灣富豪，原來頂樓（31樓）已經全部裝修過，當日雖然空氣惡劣，銅鑼灣污染指數高達一百三十七，但坐喺大玻璃前，望過去維園及遊艇會，陽光普照，景觀好靚啫。
阿美介紹我哋食南瓜意大利飯及歌王巴伐洛堤最鍾意嘅綠色pasta，確係好正斗，值得一試再試。阿美話巴伐洛堤嚟香港住君悅酒店，特別落定單要求呢度個意大利廚師為佢做pasta送過去君悅，如非佳品，歌王唔會亂點。喺呢度食飯，有輕鬆感覺，嘆番兩個零鐘頭就冇得頂咯，可惜左丁山俗務纏身，成日睇鐘做人，過咗兩點就要起身急急腳返中環，真係辛苦命一條。
此日餐廳內食中飯嘅，最多就係日本婦人，或可稱為日本師奶，佢哋老公返工搏殺，日本師奶（好斯文、好靜，唔似得我哋啲街頭巷尾師奶，一開聲就鬼殺咁嘈）就成群結隊去參觀圖書館、博物館、逛公司、行街，中午就鍾意嚟富豪頂樓食衞生健康意大利餐，其實價錢唔算貴，起碼比三越頂樓嘅日本會重平少少。
阿美話咁多日本師奶在此，坐在窗旁望東，見到Rosedale酒店，就要小心啲。因為Rosedale（珀麗酒店）高層向西，喺E字之下，就係男廁，冇遮冇掩，學足半島酒店高層男廁向海，等啲男士有大地在我腳下，一洩如注嘅快感，可惜珀麗男廁向正銅鑼灣住宅及富豪，女士望過去可能有奇觀喎。