香港俾廣州市市長揶揄一輪後，噚日又俾深圳市市長于幼軍單打，話香港前車可鑑，深圳市要控制生產成本，保持競爭力。似乎真係一沉百踩，連國內嘅地方領導都睇唔起香港。
ｉ師傅話，港府一諗到搞珠三角經濟融合，就馬上催人配合，而且事事都搵中央介入，人哋條氣點會順。其實，國內經濟發展日益開放，好多事情連中央都管唔到，港府實在唔應該抱住有中央撐腰嘅心態去處理地區關係，否則香港只會愈來愈俾人睇唔起。回歸前香港人一向都係靠自己，從來唔怕同任何地方競爭，現時最怕就係港府指指點點，政策左搖右擺，以及令人失去法治信心。
美股持續轉弱，港股噚日一度跌破9600關口，低見9597，收報9614，下跌128點，成交萎縮至57.07億元。
易達興業（855）噚日停牌，據聞大股東洽售股權單deal會落實，而且價錢唔錯，但唔會提出全面收購，益唔到小股東。今次大股東主要洽售21.3%股權，至於新買家日後會否增持，就暫時未知。
盈新遊樂（703）股價乾跌40%，收0.10元，但成交只有9600元。此股去年8月中以0.34元招股，據聞反應平平，只係勉強上到市。上市後股價反覆下跌，最近公司重被四姨太等人追數逾400萬元。公司情況似有變，大家都係避之則吉。
駿威汽車（203）噚日終出現反彈，升4.6%，收報2.85元，成交達1.54億元。據聞歐資大行認為轎車售價雖然下調，但銷售量會有可觀增長，所以叫芬佬唔怕趁低吸納。黑客則叫留意藥業股，因為美伊局勢緊張，抗生素需求可能增加，其中廣州藥業（874）開始異動，噚日升2.025元，升3.3%。
阿虎