外號肥溫嘅英國女星琦溫絲莉（KateWinslet），身形一向大大件。好似早排上男士雜誌《GQ》封面，俾個總編輯嫌佢太肥，搞到要用電腦幫佢瘦身。呢單嘢過咗唔夠一星期，最近肥溫又懷疑俾女士雜誌《Harper'sBazaar》瘦身，不過據講今次雜誌嫌肥溫嘅肥肉連電腦都執唔走，離譜到key個頭落去另一個女人身上。
話說肥溫啱啱喺《Harper'sBazaar》嘅一月號上封面，以一個激瘦索女Look現身，坊間有傳肥溫嘅手手腳腳點執都唔掂，所以雜誌社索性搵佢哋個時裝女總監影輯相，然後用電腦技術key肥溫個頭落去。
事後雜誌社同肥溫嘅發言人當然例牌否認啦，不過據放呢單料出嚟嘅時裝雜誌《Women'sWearDaily》嗰位發言人講，佢哋呢單消息百分之百可靠。查實肥溫係乜身形，我羅拉好清楚，無端端整個索版肥溫出嚟，都唔知雜誌想呃邊個？