青年才俊向來鍾意追圈中女藝人，最近佢又同一個女藝人拍緊拖，其實好多人都知青年才俊花心，不過佢都叫做生得一表人才，再加埋屋企有啲錢，所以追女仔一向好掂。但係有一樣嘢唔係咁多人知嘅，就係青年才俊連表妹都搞，重爭啲搞到報警。
呢件事發生喺多年前，當時青年才俊重喺外國讀緊書，同阿媽、阿姨、表妹一齊住，有一日屋企啲大人出咗街，佢就同個表妹搞埋一齊，咁啱佢阿姨返屋企，撞破咗件事。佢表妹都未夠十六歲，阿姨好鬼嬲，即時就話要報警，如果真係報警，睇怕青年才俊都好大鑊。
青年才俊個阿媽即時趕返屋企，求個妹唔好報警，重跪咗喺個妹面前不停叩頭，叫阿妹畀自己個仔一條生路。阿姨見家姐咁傷心，青年才俊話晒又係自己嘅姨甥，所以一時心軟，放咗青年才俊一馬。
有「韓國辣妹」之稱嘅五人組合BabyV.O.X.，不嬲喺內地都好受歡迎，佢哋噚日第一次嚟香港，今日重會喺西九龍中心搞個迷你演唱會㖭。
而BabyV.O.X.噚日就去咗新城電台接受《韓到入心》節目嘅訪問，新城重送咗隻燒豬畀佢哋，預祝佢哋喺香港大展鴻圖，五個女仔因為未見過燒豬，所以佢哋一見到隻燒豬就咿嘩鬼叫。
英國組合Suede噚日去咗商台接受訪問，話好想試吓香港嘅美食，重問記者有啲乜嘢好介紹，佢哋話覺得香港好似倫敦同紐約咁多姿多采。對於嚟緊嘅音樂會，Suede嘅成員話會以音樂為主，亦都好想啲歌迷投入啲去欣賞佢哋嘅演出。
李克勤噚日接受商台訪問時，話當日唔去商台叱咤頒獎禮，主要係因為接受唔到齋睇嗰種感覺，而且佢嗰日有工作在身。克勤又話既然播放率咁低就無謂去，所以佢都好佩服葉蒨文明知自己冇獎攞都出席。至於佢同女友盧淑儀𠵱家嘅生活就同結咗婚咁冇乜分別，佢重話佢哋兩個打風都打唔甩。
韓國歌手申勝勳因主唱《我的野蠻女友》主題曲《Ibelieve》，而為東南亞樂迷熟識，佢首歌喺各地都有改編版本，申勝勳前晚去港台接受訪問，話孫楠唱嘅內地版同范逸臣嘅台灣版《Ibelieve》，佢都聽過，但新城DJ啤梨唱嘅廣東話版就未聽過。申勝勳重話香港藝人佢只識劉德華、黎明同成龍，如果喺香港見到佢哋，一定會打招呼喎。
