自定路線遊車河，最忌趕頭趕命；一站又一站，飛車四圍撲，又要顧及泊車位，邊算遊車河？
是日推介一條簡單路線，吃過午飯出發，沿青山公路走，先到小欖玩高卡車，之後直踩入龍鼓灘，夾啱時間看日落，玩個夠，然後再過隔鄰的燒烤場BBQ，這樣輕輕鬆鬆過一日，你又點睇？
記者：陳漢榮
攝影：彭自維、陳盛臣
模特兒：Lydia、Vicki
一提飆車，兩模特兒心情各異。
Vicki喜出望外：「正！好耐都未玩過。」飛快步往接待處，忙着選頭盔；身材的骰的Lydia眉頭一皺：「未玩過，好驚，會唔會炒車㗎？」
打賭賽車
落跑道，選戰車，10部大車6部小車，Lydia不自量力，矮小身軀硬要挑大車，難為工作人員要給她額外的背塾，雙腳才拈得着油門與煞掣。開跑前，兩女輸賭，5圈為限，誰輸了就請吃下午茶。
監人陪炒
跑道全長600米，路不算窄，但急彎多，車速最高24公里，Vicki踏盡油門，不消一刻已拋離3圈，只有吃塵份兒的Lydia不忿，加速，如箭般撞向Vicki的戰車：「呢啲咪叫攬炒囉！追你唔到都要你陪炒。」
願賭服輸
結果Lydia輸，只好自掏腰包，到小食部捧回大碟小碟點心：「居然有即叫即蒸點心食，幾有誠意。」Vicki附和：「正！點心味道唔錯，因為有人請。」「你好寸喎……」之後鬥嘴離場。
首次玩高卡車的唐小朋友：「好好玩呀！我贏咗爸爸，不過我知爸爸讓我嘅。」
1荃灣入，行青山公路（大欖段），見青發街轉左直入香港小型賽車會。
2行青山公路（青山灣段），到三聖邨左轉入蝴蝶灣公園，經龍門路、龍鼓灘路直入朱古力燒烤場。
香港小型賽車場
電話：24414447
地址：屯門青山公路小欖青發街59號3號場
營業時間：上午9時至晚上7時
收費：星期一至五$100（每15分鐘），星期六、日及公眾假期$100（每12分鐘）
泊車：場內有空地，提供約200個車位，星期一至五免費，六、日及公眾假期$5一日。
要數最受歡迎細車，又怎能少得了福士Polo呢！除了外形吸引，闊落車廂空間及齊全設備亦為其最大賣點之一；而四個安全氣袋組合，亦保障了車上乘客們的安全。一台1.4公升直4DOHC引擎，馬力雖然只有75匹，但勝在扭力輸出強勁，加上還有5前速手波及4前速自動波供你選擇。
引擎：1390cc直4DOHC
馬力：75ps/5000rpm
扭力：12.9kgm/3800rpm
尺碼：3897×1650×1465mm
軸距：2460mm
車重：1065kg起
新車售價：$109,000（只限10部2002年現貨）
車輛提供：合泰汽車（28828938）
驅車直入龍鼓灘，Lydia得悉下一節目是看日落，即說：「天寒地凍吹風睇日落？」下車，沿着沙灘慢走，風景不過爾爾，沙灘盡頭，有一天后古廟，入內，忽有一人如鬼魅般閃出，是位老婆婆：「裝香啦！呢度求財最靈，好多人特登揸車入嚟拜神㗎！」Lydia：「九唔搭八閃出嚟，嚇死人咩，都唔知真定假。」說罷誠心上香，還念念有詞，明顯在求神。
鹹蛋黃高掛沙灘上
倦了，折返沙灘休息，Vicki懶洋洋地說：「凍就凍啲，不過空氣清新呀！吹海風嘅感覺一流。」對表，搭正五時半，如血斜陽就靜靜地掛在水平線上，正在玩泥沙過三關的Lydia大喊：「好大個鹹蛋黃，靚到爆。」Vicki插嘴：「梗靚，唔計大嶼山分流，龍鼓灘係香港第二極西，係人都知睇日落至正，乜你咁無常識？」「你真係好寸喎……」「寸你就梗㗎啦……」又是鬥嘴收場。
入黑，喊餓，過馬路有7間燒烤場，其中一間叫「朱古力」，Vicki說：「個名咁Cute，就呢間啦！」家庭式經營的場仔雖然地方細細，但親切感搭夠，老闆劉生極好客，親自開爐、加炭、搬枱搬櫈，最喜與人聊天，掛着口邊一句話：「兩位靚女食飽至准走，唔夠開聲，燒到攰我幫你燒。」逗得她們大樂。
值得一提的是食物款式，雞翼豬扒等指定食物自是不缺，比較特別的是火鴨腎、牛油焗椰菜、黑椒腸。試味有感，Vicki：「正！至正黑椒腸！快燒快熟快飽肚。」Lydia：「牛油焗椰菜，勁香！」難得二女今次沒鬥嘴，開開心心抹嘴離場。
朱古力燒烤場
地址：屯門龍鼓灘沙埔崗村234號
電話：26138522
營業時間：星期一至五下午4時至午夜；星期六、日中午12時至午夜。
收費：$60位，任燒任食。
泊車：場內有空地，提供約50個免費車位。