禮拜六列斯對西布朗，想估首名入球者嘅波友又多番個選擇。科拿喺禮拜四臨動筆簽字加盟曼城前突然轉軚，話就話想留番喺列斯證明自己，計我求大俠話擺明係兩間球會傾唔掂數。科拿轉會唔成未必慘，最慘係本來一心加盟列斯嘅基巴臣，𠵱家列斯少咗賣走科拿筆錢，恐怕唔夠米買巴西佬囉。
對於轉會告吹，英國傳媒有幾個唔同版本，我就打死都唔信科拿對列斯咁忠誠；實情應該好似英國《太陽報》咁講，係曼城擔心成日受傷嘅科拿會觸傷patpat（臀部）舊患，決定唔一筆過畀晒錢列斯，而係先畀一筆，等科拿踢夠某個場數再畀埋尾數。一直等錢使嘅列斯當然唔順氣，最終一拍兩散，交易告吹。講番基巴臣，佢為咗帶埋十五歲女友赴英倫，提早求婚，𠵱家轉會唔成，總算提早娶得妙齡嬌妻。
我求大俠噚日先提過哈索賓基，估唔到又有關於佢嘅新消息。聽講前日巴塞教練雲高爾同高層開會，鬧到七彩，理由係雲高爾埋怨會方遲遲唔出手買車仔前鋒哈索賓基。睇嚟哈索賓基人都未到，就已經搞到隊波有內訌，影響士氣。真係「我雖不殺伯仁，伯仁因我而死」囉。
早排有報道指曼聯前鋒雲尼斯達羅嘅爆炸性言論，講「曼聯人工好似天文數字咁高！」同埋「只要球隊贏波，費格遜就准許球員定期搞賭局！」曼聯大戰車路士前夕，會方當然唔想球隊俾啲流言而影響，所以急急反駁話全部都係傳媒曲解咗雲尼斯達羅嘅說話喎。
列斯就人多走唔成，佢哋今日英超對手西布朗就啱啱相反，仍然四圍班救兵護級。佢哋啱啱借到PAOK沙朗歷基嘅後衞烏甸斯，𠵱家就想向熱刺中場舒活、華倫西亞前鋒沙華、同埋紐倫堡後衞辛拿等等。不過至怕領隊美臣掛住諗班兵，荒廢晒調兵遣將嘅事喎。
最近英格蘭傳媒最關心嘅，一定係國腳喺世盃時聚賭。最新嘅主角竟然係奧雲，更指明佢當時重同老將舒寧咸拍檔開莊㖭。𠵱家英足總高層就撐唔關奧雲仔事。老實講，奧雲仔好仔印象深入民心，希望最後證實佢無辜啦，如果唔係就喊死佢嘅fans囉。
噚日賀歲波記者會足總突然公布委任郭家明接手港聯教鞭（可能教埋港隊），聽聞今次換教練同省港盃成績差勁冇關，主要係有董事局高層想家明做。講真家明教對球員嚟講係好事，不過，記得佢九七年做港隊教練，因同當時港隊領隊官永義意見唔啱而劈炮，𠵱家手握愉園重兵嘅官生對家明做有乜反應，真係難估咯！