唔知各位近排行街嗰陣，有無亞Mark咁好彩，見到部掛有AM牌頭，車身重有大大個字寫住MildHybrid嘅豐田Crown呢？及後，經亞Mark打聽得知，原來呢部就係早前剛響日本隆重面世，配備有雙動力引擎嘅新車型號。事緣響日本方面，Crown嘅地位較凌志LS430更高級，能夠配備呢台MildHybrid偈，亦可見廠方嘅重視程度。至於今趟引入係由豐田代理一手策劃，借畀特區政府試用三個月咁多啦！若然表現理想的話，既可替換原有車隊之餘，政府重有帶頭倡議慳油環保嘅訊息㖭！都唔知幾有Face呀！再者，早前政府高官要遏止柴油車嘅增長，而帶頭改用耗油量高、但效益較低嘅電油偈車，響𠵱家政府要縮減開支嘅同時，委實係一次轉移視嘅好機會㗎！
另外有傳聞一則：踏入2003年，香港車壇接連有大事發生，繼豐田代理入主大發響香港嘅業務後，近期有傳日本車界一位殿堂級人物有意引退，而接任者亦非等閒之輩，若然屬實的話，跟香港車壇未來走勢，將會有好大嘅影響力；究竟事情發展會係點？咁大家就要留意亞Mark嘅報料喇！