《記者戴維、郭晨上海直擊》翁虹早排喺台灣拍戲發生意外，整傷咗條腰，不過好彩佢𠵱家已經好番，兼夾恢復工作，佢家陣大多數時間都係留喺內地，日前佢就喺上海電影製片廠，接受東方電視台《新評頭論足》節目訪問，喺半個鐘嘅節目入面，翁虹表演唱歌、跳舞同舞劍，其間佢重做一字馬，今次係佢受傷後，第一次做出呢啲高難度動作，現場啲人見到都拍爛手掌。
而翁虹同日籍男友分手之後，早排傳佢有一個上海男友，但佢話只係誤傳，重強調自己仍然係單身，問佢可會考慮同上海男士拍拖，佢話有可能，因為佢唔一定要搵香港男友，唔單止上海男人，其他地方嘅單身男人都有機會喎！
今次上海嘅電視台專程訪問翁虹，除咗因為佢喺內地有一定嘅知名度之外，對於佢早排受傷，而能夠積極面對嘅精神亦好欣賞，所以訪問入面都有問佢點解可以咁堅強。而翁虹對於今次嘅訪問節目都好認真，事前喺香港將自己嘅個人珍藏帶去電視台畀佢哋參考，做足準備。
孫燕姿噚日嚟咗香港，以代言人身份去灣仔會展出席紅茶廣告記者會。燕姿話今次以七位數字酬勞拍廣告外，廣告商重支持佢喺香港、北京、上海、成都同廣州開個唱，不過日期未定。
燕姿話佢近日好開心，因為新碟喺台灣出咗三日已經有十五萬銷量，佢好有信心喺亞洲地區可以衝破一百萬銷量㖭。孫燕姿今日就要離開香港，所以去唔到港台嘅音樂頒獎禮。
蕭正楠同關心妍呢對緋聞情侶合作拍網上劇《吻了再說》。內容講話關心妍飾演嘅娛樂版記者，暗戀藝人助手蕭正楠。蕭正楠同女友分手後成日飲醉酒，有晚佢見到關心妍，難得搵到人傾訴，於是就情不自禁同關心妍熱吻。拍呢場戲時，導演話要清場，唔想佢哋分心。蕭正楠同關心妍拍得非常投入，重好似戲假情真㖭！
早兩日張曼玉去咗韓國宣傳《英雄》，據韓國報章嘅報道，由於同行嘅導演張藝謀，全程淨係關心會唔會見到韓國女星金喜善，同埋指定喺首映度要金喜善坐喺佢旁邊，搞到張曼玉覺得俾人冷落，自尊心受損，心情唔多好。聽聞張導演正想搵金喜善做下一部新片《秦始皇》嘅女主角，所以今次去到韓國搵金喜善密密斟。
任賢齊噚日喺西貢蠔涌片廠拍攝瑪莎拉蒂跑車廣告，酬勞有七位數字。佢話之前瑪莎拉蒂送咗一部價值一百七十萬嘅跑車畀佢，𠵱家放喺上海好少用。
而有傳小齊會同霆鋒合作拍賽車片，佢話：「我就落實咗會拍，霆鋒揸開supercar，我估賽車嘅話，佢會贏我，但如果比賽電單車，我諗自己會贏。」
顏仟汶同吳霆近日拍攝電影《聊齋誌異之孽慾狐鬼》，喺戲入面，顏仟汶裸露上身同吳霆喺山邊親熱，顏仟汶日前話：「都好辛苦，因為喺荒山野嶺拍嘢，我個背脊都餵晒蚊，反而吳霆就冇俾蚊咬，或者啲蚊揀靚女嚟咬。」
