東半山司徒拔道47A老牌豪宅，頂層巨型複式單位啱啱易手，單位三千六百呎，連千二呎天台，成交價2080萬，呎價5778蚊。呢個單位嘅原業主同前租客都大有來頭。
原業主係有地產界「釘王」之稱嘅桂洪地產已故主席陳桂洪，佢喺97年5月以3750萬買入，當時呎價過萬。無幾耐就租咗畀人，租客就係特首董建華個女，一租就租咗四年，直至舊年中約滿遷出。
代理透露單位市值月租大約九萬蚊，四年嚟大大話話都交咗四百幾萬蚊租，不過對業主嚟講，回報率唔夠三厘，真係無乜肉食，所以約滿之後明知會勁蝕都即刻放售，但係都要放成半年先至賣出，個價足足跌咗四成半，帳面唔見咗1670萬。有代理估，買家可能係租緊附近司徒拔道46號豪宅眺馬閣嘅歌星陳慧琳。
一向樂於參與公益活動嘅中原施永青同恒基張炳強（Donald），兩人決定一齊參加，苗圃行動明年第二季舉行嘅「二萬五千里長征」籌款活動，噚日Donald已開始向老記們募捐。
聽苗圃行動名譽董事施永青講，唔係行晒二萬五千里，會分段行，百幾里一段，佢同Donald應該會行雲南嘅金沙江至大渡河嗰段。
Donald話到時會帶多啲鞋去，唔夠嘢食時可以煮嚟食。
佢地行嘅路線有段古，話說搶渡金沙江係中共紅軍長征時，一次重要勝利，當時擺脫幾十萬國民黨軍隊嘅圍堵截擊，然後通過大涼山彝族地區，再渡過大渡河向西川進發與另一路紅軍滙合，當時紅軍物資短缺，真係鞋都冇得食。
和黃上個禮拜請記者去上海時，公布今個禮拜六滬港兩地推售上海匯賢居，佢哋話最新情況係收到超過六百個認購，較首批公開發售單位超額三十二倍。至於示範單位開放四日，就有逾千人參觀。
發展商話設喺紅磡嘅銷售中心，原本諗住只係招待員工同特選嘅認購買家，但𠵱家就公開畀市民睇，等多啲人認識乜嘢係上海豪宅喎。上海徐匯區匯賢居，共有七座住宅，其中六座已經喺舊年賣晒，淨番第一座百零伙未賣。首批十八伙，平均呎價千七蚊人民幣。
港深兩地通關在即，港人往深圳睇樓同買樓都有所增加，令內地發展商有憧憬，甚至出現香港發展商恨咗好耐嘅加價場面。
喺深圳皇崗（即係今個月27號實施二十四小時通關嘅第一個關口）嘅朗晴馨洲，在過去兩個禮拜賣咗超過五十伙，累積就賣近二百個單位，發展商見咁賣得，計劃農曆年後加價約3至5%。
呢個單幢樓，高三十二層，共406伙，面積380餘到900多呎，今年8月入伙。首批八十個單位去年11月內購，唔使三日就賣晒。單位呎價525蚊，售價最貴唔使四十萬。
過檔利嘉閣三個零月嘅新任董事廖偉強，有見公司上月業績收支平衡，近期又攞到幾個獎，所以出錢擺咗三圍，請啲區域經理同後勤高層食一餐，施永青都有出席。
廖偉強話最近公司各區都搞團年飯，有時間佢都會出席。
蘭西
電郵地址：