郭羨妮（Sonija）日前應邀出席由本報舉辦的「偶像齊齊玩」，與fans到北角SlopeInfinity室內滑雪場學滑雪，首次與fans聚會的Sonija表現興奮，熱情的fans除與Sonija交換選美心得外，更有男fans問她何時與男友溫兆倫結婚，令她十分尷尬。
郭羨妮上周四應本報邀請，與fans一行十多人到位於北角的滑雪場學滑雪，她表示今次乃出道三年以來第一次與fans聚會，十分興奮。雖然大部份fans均首次接觸滑雪，但為了一睹偶像風采，他們皆大膽接受挑戰。
在學習滑雪其間，雖然fans跌得「一仆一碌」，但他們仍努力嘗試。他們更把握機會在滑雪其間不斷問及Sonija與男友溫兆倫的感情狀況，其中一名男fans更突然問Sonija：「你幾時結婚？」令正在專心滑雪的Sonija大吃一驚及表現尷尬地說：「咦……乜你問啲咁嘅嘢嘅。冇咁快，遲啲先啦！」其中更有一位女fans自稱曾參選港姐，起勁地與Sonija交換選美心得，雞啄唔斷。
郭羨妮與溫兆倫的戀情曝光至今，除得到各方肯定外，更有fans支持，令Sonija感動不已，她說：「今次係入行以嚟第一次同fans聚會，其實喺網上我都見到有fans支持，今次就真係正式見到。啲fans好熱情，估唔到佢哋會問啲感情問題，真係嚇咗我一跳。好多謝啲fans唔只支持自己，連佢（指溫兆倫）都鍾意埋，聽到fans同我講『只要你開心就得』，真係好開心。」
採訪：羅慧敏
攝影：陳慧安
場地提供：SlopeInfinity
