上個禮拜六車路士主場大勝查爾頓四比一，查爾頓方面賽後就大彈史丹福橋球場個場地唔掂，沙多地硬，重有人話似喺沙灘踢波，名副其實係賴地硬。查爾頓日前向聯賽會提出重賽要求。我求大俠無睇過當時場地狀況，只覺得如果因為場地差而重賽嘅先例一開，以後就多麻煩囉。
據查爾頓發言人講，佢哋影晒相證明當時場地唔多掂。之但係以前從未有球隊正式投訴車路士個場。我諗如果個場真係差到咁離譜，車路士班球員就算有主場之利一樣唔會踢得輕鬆。睇番場波精華，查爾頓輸嗰幾球波後防真係有漏洞，淨係賴地「爛」又唔合理。再講，如果呢次查爾頓上訴得直，之前作客輸過畀車路士嘅球隊又有樣學樣，翻舊帳咪盞搞？
最近盛傳巴塞隆拿又想斟車路士前鋒哈索賓基，計我話巴塞隆拿可以打定輸數，因為哈索賓基近期喺車路士踢得唔算太差，最重要係一旦賣走佢，車仔其他鋒將都唔似夠班擔大旗（蘇拿近況回落、古莊臣麻煩又爛賭），照計班高層唔會咁冒險。話晒隊波喺聯賽爭唔到冠軍都好有機會入前四爭來屆歐冠盃參賽權。
祖雲達斯前晚喺意大利盃八強首回合俾佩魯賈砌低，最衰就係為佩魯賈入兩球嘅米高利正正由祖雲達斯借過去嘅。祖記教練納比賽後毫無風度：「米高利表現麻麻啫。」話晒係「自己人」，人哋入兩球點都要讚兩句啩。講開又講，我哋青蛙仔前日貼三串四過兩關，而貼祖雲達斯場波中正下盤，算有交代啩。
上個禮拜有個笨賊本來想入屋企偷嘢，好揀唔揀入咗愛華頓中鋒鄧肯費格遜間屋，結果被發現而同「長人」糾纏。大家一諗到鄧肯費格遜個身形，就想像到最後邊個打贏啦。唔知係咪無波踢心火燥，據講鄧肯費格遜將個賊打到遍體鱗傷，搞到個賊要告番佢謀殺㖭，咁都得？
中國國家隊教練阿里漢前日喺昆明亮相，同埋喺噚日首次帶領國足進行集訓。咁大件事，國內體育傳媒當然想唞吓氣都難。各傳媒為咗親近呢位國足新帥各出奇謀，有啲就出動熟荷語記者，有啲甚至出「美人計」，派靚女記者採訪阿里漢，全場豔光四射。前教練米路天奴域就有位知己李響，唔知阿里漢會唔會同樣搵番個紅顏知己呢？