重有兩個星期就係農曆新年，相信唔少朋友都會有三、四日的假期，如果想花費不多又可以出外旅遊散心的話，不妨選擇參加國內的短線團。講到好意頭，首選省港澳四天行大運，實行率先體驗珠三角大融合。其實喺珠江三角洲之外，粵北嘅韶關、粵東嘅潮汕亦有不少別具特色嘅旅遊區，充滿不一樣嘅新春景象。要自由自在的話，亦可選擇旅遊套餐，節目時間可以自己安排。
記者：劉耀
一睇行程表，嘩！行程咁密嘅，四日內去勻深圳、番禺、廣州、珠海和澳門，節目編排動靜皆宜，絕對適合一家大細、扶老攜幼玩幾日。農曆新年的團費加到二千元，抵唔抵玩見仁見智，不過名額所餘無幾，有興趣就要快啲報名！
行程可以說是走馬看花，第一日便會到達三個景點，分別是仙湖植物公園、弘法寺及歡樂谷。深圳仙湖植物公園，可以欣賞到稀有的植物及湖光山色，由於是農曆新年，這裏會被布置得花團錦簇，新年氣氛跟隨花氣襲人。另外較受年輕人歡迎的，必定是全中國最大嘅現代化主題公園歡樂谷，全園由8大主題景區組成，共有100多個遊戲項目，就算唔燒炮仗，笑聲都可以除舊歲。
中山龍井坊的節目可算是最多姿多采，既可坐牛車、騎馬體驗一下農民生活外，最緊要食埋中山最出名的石岐乳鴿，對我呢個長期生活在城市的人來說絕對是一種新體驗。自問未有膽量騎當地的山地馬，還是坐牛車較安全，出村行一個圈?45，車程約十二至十三分鐘，只在村內行圈每次?20。
整個行程中，最令我心花怒放的，必定是到番禺嘅百萬葵園，皆因葵園從荷蘭引進了11萬棵鬱金香種子，創辦了金香園，所以大家可以在新春期間欣賞到數以萬計色彩鮮豔的鬱金香，絕對是難得的體驗。另外番禺的寶墨園亦不能錯過，除別致的園景外，被列為健力士世界紀錄大全嘅「清明上河圖」巨型浮雕都值得一睇。
旅程最後一日，早上會遊覽清光緒皇帝賜建嘅梅溪牌坊旅遊區，又會參觀附近嘅珠海名人蠟像館。回程會搭車經拱北去澳門，呢段時間就最自由自在喇，因為會安排大家自由行街購物，大家更可以去娛樂場所碰吓運氣，話唔定會發番一筆新年財。
春節省港澳四天行大運團
有乜行程：參觀仙湖植物公園、歡樂谷、百萬葵園、長隆夜間動物世界、黃大仙廟、珍靈養生谷等。
團號：ZSH04-SPC
團費：
31/1成人$2,119、小童$1,527
1/2至2/2成人$2,067、小童$1,477
3/2成人$2,097、小童$1,507
碼頭稅：$20
小費：$180
查詢：21088888（康泰）
如果想又食又玩又歎，大可以參加呢個團，會去中山嶺南水鄉欣賞民族歌舞表演，又去泉林旅遊山莊，呢度可以玩碰碰船、高山滑草、遊艇等，山莊內又有個軍事博覽中心，可以體驗坐裝甲車、打大炮嘅樂趣，重可以去仙沐露天溫泉享受38個各具特色嘅溫泉池。
除咗行程夠歎外，重會去橫琴島品嘗該島著名嘅蠔皇宴，橫琴島具有良好的生態環境和特有的鹹淡水相融滙的特質，給蠔養殖提供了良好的環境，所以曾榮獲中國綠色食品發展中心頒發的國家綠色食品證書，證明沒有污染，愛吃蠔的人士必定可以擦餐飽。
泉林山莊、中山仙沐露天溫泉三天團
團號：ZPP3
團費：31/1至3/2成人$868起、小童$708起
小費：每天$40
查詢：82002299?82033055（美麗華旅運）
唔想跟團咁侷促，時間行程盡在自己安排，可以選擇套票。呢個套票包五星級珠海怡景灣大酒店雙人房一晚，酒店自助早餐兩份，珠海御溫泉度假村或中山仙沐園溫泉門券兩張，酒店穿梭巴士接送，新年鍾意點玩就點玩。
怡景灣大酒店春節溫泉套票
團費：31/1至5/2出發，成人兩位價錢由$1,596至$1,876
團號：PYC
查詢：23900421（學聯旅遊）
呢個套票包括直航船及穿梭巴士往返香港及目的地，雙人客房一晚，免費享用恒溫泳池及桑拿兩次，射箭場射箭20支，早餐兩份，保齡2局，碧桂園農莊門券兩張。自由自在，重可以周街搵嘢食。
順德碧桂園農曆新年套票
團費：28/1至4/2出發，成人兩位$1,196至$1,556
查詢：27803233（一心旅遊）
如果你好鍾意動物，呢個團至啱你。一開始就撲去鄉村警犬睇訓練有素嘅狼狗表演，又去番禺騎士堡俱樂部騎馬；夜晚去廣東省首屈一指嘅番禺長隆夜間動物世界，大家坐住吉普車，望住地上周圍走嘅獅子、老虎。睇完動物，重會去表演廣場欣賞驚險刺激嘅馬戲表演，真係娛樂無窮。
番禺長隆夜間動物世界、廣州花卉博覽園二天美食超值團
團號：GTT02R
團費：31/1成人$483、小童$453；1/2成人$533、小童$503
小費：每日$50
查詢：29288882（永安旅遊）
如果你鍾意睇祖國嘅錦繡河山，要感受最傳統嘅新年氣氛，去潮汕啦！汕尾嘅鳳山媽祖廟、榮獲國家4A級景點嘅礐石公園當然要一遊，唔飲過潮汕功夫茶，唔食過潮汕風味宴又點算去過潮州？重有潮州八景最具特色嘅湘子橋，有潮汕大宅門之稱嘅陳慈黃故居，一定令你目不暇給。
至新潮汕風光超值三天團
團費：4/2、6/2成人$688、小童$598
小費：每日$40
查詢：27762774?27769776（匡域旅遊）
新年要食得招積，金裝鱘龍宴、極品鯨龍宴、蔬菜火鍋宴加埋第一天自助中式早餐真係唔少嘢，參觀中山豐本農場加金季果園，合時水果任你食。重去埋中山最新落成嘅夏威夷SPA世界，盡情享受各類水療設施。
中山夏威夷SPA世界、鱘龍魚養殖場2天美食團
團號：CSDG02SP
團費：
31/1、2/2及3/2成人$728、小童$573
1/2成人$788、小童$633
小費：每日$40
查詢：27322888（新華旅遊）
位於廣東省東部嘅梅州四圍山巒環抱，有「廣東客家中心」之稱，係客家人嘅根據地。呢個團會帶大家盡情遊覽梅州名勝如靈光寺、葉劍英故居，鍾意蒲夜店嘅，又可以逛逛啤酒街，走之前嗰晚又會住吓富建築獨特嘅雁南飛茶田度假村。
雁南飛茶田度假村、客家風情三天團
團號：MUA03
團費：
31/1成人$869、小童$769
1/2至3/2成人$1,069、小童$869
小費：每日$45
查詢：23622022（關鍵旅遊）