周二曾提過恒指短期宜升穿9900，原因是覺得恒指上升動力不足，有點焦慮。周三市場憧憬英特爾業績帶動美股當晚造好，但恒指當日只上升77點，收9873，始終升不破9900阻力，加上外圍杜指期指偏軟，趙飛雲已覺得有點奇怪，但受英特爾業績強勁的先入為主影響，仍保持向好看法，誰知中正陷阱。
英特爾去年第4季純利多賺1倍，但財務總監睇淡今年第1季業績，好消息變成壞消息炒，原先偷步炒英特爾業績的好友跳車，周三晚美股全面下挫，杜指跌119點，收8723，納指跌1.5%，收1438。以勢論勢，杜指及納指的技術仍未變壞，但料會進一步考驗50日線及20日線支持，守穩則升浪未完，跌穿則確認轉壞，下試近期低位。
昨日仍有點心存僥倖，開市無即時沽貨，而港股早市仍守住50日線9780水平，但新地（016）走勢甚差，在跌至47元水平時，趙飛雲按原定部署於0.35元沽出新地Call輪9593止蝕。午市恒指守不住50日線，惟有投降，恒指Call輪9552亦在0.18元沽出止蝕。
既然手風欠順及美伊戰事一觸即發，股市將大幅波動，暫時忍一忍手，睇清形勢再作部署。其實恒指雖跌穿50日線，但只要守穩9600水平，好淡仍是勝負未分。
趙飛雲