講述警方卧底同黑社會卧底大鬥法嘅電影《無間道》叫好叫座；但真係好諷刺，套戲製作期間曾經因為故事涉及黑社會卧底混入警方，俾警方話唔好而引起風波，但出到嚟估唔到效果咁好，議員張文光噚日重喺立法會保安事務委員會話睇咗之後要「感謝警方嘅卧底喎！」
警方一直都好少透露卧底行動，唔知係咪受到套戲影響，警務處處長曾蔭培竟然高調喺會上公布卧底行動資料，但佢話自己未睇過《無間道》，議員周梁淑怡即刻話：「你唔可以唔睇，唔睇好大損失！不過我要澄清我冇利益關係㗎！」
麥國風亦插嘴話自己都要睇睇趕潮流，一哥笑笑口話：「我話未睇啫，冇話唔睇喎！」嘩，唔怪得套戲票房突破五千萬啦，個個都喺度推介！
傳真︰2623-9278
電郵︰
