中大國際（909）過去兩個月，股價由0.20元樓下，唔經唔覺已升至0.30元水平，今個月最高重見過0.34元，但成交始終唔夠大。經紀陳話，咁嘅情況通常係未搵到足夠水源，但隻股想炒上嘅意圖就十分明顯。
小初記得，中大喺2001年年底上市，當時隻股一度炒過上0.60元樓上，據聞當時嘅炒家成功散咗唔少貨。收尾隻股歸於平淡，但在舊年９月，忽然間嚇人一驚，原來佢上市唔夠1年，業績即刻走樣，中期純利勁跌九成有多，搞到股價曾單日勁插55%。
經紀陳話，自舊年年底起，唔少證券行都收到查詢，問有冇意思幫手，由於生意淡薄，加上隻股股價跌咗咁多，所以有人願意幫手。
早排隻股公布，話會喺江蘇省鹽城，投資6000萬元，發展油漆及塗層生產線及洗車系統生產線業務，呢單交易頗有玄機，可以留意交易完成日期炒番轉。
慕容小初