阿松噚日為自己針對高收入人士徵稅言論辯護。阿虎當然明白「能者多付」係一個必然既事實，但問題係畀得唔順氣，如果辛苦賺嘅錢畀咗政府無無謂謂咁浪費，試問邊個會甘心？
過去政府部門年頭獲批預算，年尾就算用唔晒都夾硬花光，以免來年預算被削，結果將納稅人嘅錢用喺無謂地方，呢種理財方式就要徹底改變，應由「BudgetFromZero」理財哲學所取代，即每年預算開支中每項支出都要有足夠理由來支持，而唔係根據往年開支為基礎作出調整，只有咁樣才可避免浪費。
美股周三回落，港股昨日跟隨下跌130點，收報9743，成交62.27億元。中資股繼續回吐，而且跌得幾急。駿威（203）一度跌逾6%，低見2.675元，最後收2.725元，跌4.3%，成交高達2.48億元。黑客話，已經有基金開始減磅，近期要小心汽車股。中糧國際（506）跌市中傳出配股消息，更加嚇親芬佬，搞到股價急挫7%，收2.275元，以全日低位收市。
太平協和（438）主席汪世忠噚日請分析員食午飯，目的當然是係講吓近期公司發展，為股價打打氣，股價果然逆市上升2.15%，收0.475元，成交有成1084萬元，好似真係有料到。不過，聽分析員講，太協主要想在上海搞旅遊景點，借上海世博概念炒作。
任總噚日話外滙基金今年會多啲投資海外股市，因為股市連續四年下跌係好少見。睇番外滙基金戰績唔錯，官鱷大戰一役都死唔去，任總係有啲運，所以不妨跟佢玩一鋪。外圍股市升，港股好少唔升，可以買啲盈富（2800）當儲蓄。
阿虎