恒指忽然散130點，恒指Put輪領盡風騷，龍虎榜上頭10件，有6件係呢批淡友輪。
排頭位嘅係9448，前日1仙，昨日2.2仙，升幅120%，有145球易手，槓桿率百幾倍，加上係仙輪，波動起上嚟，自然好誇張。排第2位嘅係9444，收10.1仙，升55%，有93球易手，槓桿率幾十倍，又平水咁滯，自然發揮槓桿作用嘅爆炸力。
9448同9444都係炒埋下星期就冇得買賣，9448溢價2.0%，9444溢價0.5%。指數再跌200點，揸9448唔使輸；指數再跌50點，揸9444唔使輸。個市唔適宜睇得太淡，有人維持秩序，Put輪博唔過。賭大市走勢，𠵱家買恒指Call輪贏面大過買Put輪，近期對象係9552，壽命長啲嘅係9668。
睇太A（019）逆市升30仙，中銀（2388）企定定，就知道有人頂住大市，亦可能係玩轉馬遊戲。呢兩件指數成份股嘅相關Call輪，太A9475收13.7仙，跌4.3%，下一回合走勢，一係上升，一係正股回落；中銀9462收11.2仙，跌3.4%，溢價得番0.6%，槓桿率7.5倍，下一回合發展，一係中銀回落，一係隻輪上升，7月到期，冇乜理由𠵱家幾乎平水。
章盛