香港地應該冇乜人唔識幪面超人同鹹蛋超人，不過睇咗咁多年咯，好聽啲就係童年回憶，唔好聽就即係out。但其實幪面超人都好努力與時並進，幾十年嚟出過好多代，最新嘅二○○三年版重係靠部手機變身，個形象即刻cyber咗好多。
七十年代開始嘅幪面超人都係由昆蟲進化出嚟，所以個頭都有兩條觸鬚眼又大，曾幾何時又變身做亞馬遜河怪獸版力求有創意，但係佢哋變身時都係空手扭幾吓就得咗，呢個手勢真係hit到隔籬屋嘅B仔都識做。
而剛啱面世嘅幪面超人555，外形同一般機械人冇乜分別，有啲未來警察feel，佢要有手機先變到身。我羅拉就認為舊版一睇就知係人扮，騎呢啲人性化啲，不過可能其他幪面超人迷會受呢個威猛look。佢用嚟打怪獸嗰把槍係由電話變出嚟，重大過八十年代嘅水壺電話，又幾鬼頂癮。
而噚日公布咗新一代幪面超人，係十八歲嘅靚仔新人半田健人，啲日本傳媒讚佢有木村拓哉咁靚仔喎！