專責香港同大陸事務嘅英國新任外交部政務次官韋明浩嚟香港旋風式訪問兩日，當然係走馬看花。
不過，當八方問佢關於中西區區議會有人建議，搬兵頭花園嘅英皇佐治六世銅像去馬騮籠附近呢條最尷尬嘅問題，佢就有備而來，答得非常得體。
韋明浩話，佢自己都做過地方議會嘅民選議員，銅像放喺邊當然係地方議會嘅職責範圍，言下之意英國佬好難有聲出。但係佢都好婉轉咁話，最好就可免則免啦！講到尾，佢認為呢啲都屬於香港歷史文化一部份，搬走會有啲可惜。
咁究竟英國有冇政策處理前殖民地嘅銅像呢？答案係冇，所以就算第日有人要郁維園個維多利亞女皇銅像，睇嚟英國佬都冇乜符，亦肯定唔會搬返祖家，始終時至今日，殖民地遺留落嘅嘢都已成歷史喇。
傳真︰2623-9278
電郵︰