昨日講開英國UCL（UniversityCollegeLondon）請校長，諗起上星期碰到一位商界權威，威到屬於國際名人級，左丁山冇資格同佢講生意，只有係咁意講吓教育，名人話：「唔使講都係美國好啦，英國啲大學，經費不足，好難同美國一流大學爭。」咁牛津劍橋又如何？名人話：「牛津靠名譽度日。其實單以英國而論，好多新進大學（如華威、UCL）銳意與牛劍競爭，已經追得好近，好有機會超越牛劍。」
點解牛劍如逆水行舟，不進則退呢？名人話：「六七百年歷史嘅學校，管治制度重係三四百年前嗰套，人人可以話得事，變咗冇人話事，於是好多嘢都做得慢，或者做唔到，追唔上時代要求，點可以適應社會變化吖。反而哈佛耶魯呢啲，雖然歷史悠久，但管治制度比較靈活，與時代同呼吸，同樣進步。」
話就係咁話，牛津劍橋始終有招牌效果，嚇得吓人。據講滙豐收購內地保險公司（平安）部份股權，研究得好仔細，到咗最後階段，負責去深圳傾嘅英國人，係劍橋舊生，而平安保險派出嘅談判隊伍，又有咁啱嘅，有三個劍橋海歸派，令英國人印象深刻，好快就水到渠成，旁人恨都恨唔嚟。入英國啲名牌大學，讀書靠自己，唔會有人監你，天才入到去，當然係天才出番嚟，呢啲人唔上堂都可以攞十A，入到去唔讀書，要畢業亦唔難，所以去英國讀碩士，以名牌價值衡量，抵㗎！