個市好似悶悶哋，最後恒指高收，升77點。4隻恒指成份銀行股，隻隻升。東亞（023）收14.35元，升幅4.4%最大，派成績表有期，下月11日盤數彈出，銀行股中宣布業績打頭陣，例牌係東亞。
東亞末日Call輪9191，成為是日輪王，收5.5仙，升幅90%，有5萬銀金額成交。下月4日夠鐘，溢價1.4%，槓桿率26.1倍。東亞由上月底至今，升咗1元，估計唔易再上，9191博唔過，亦好難博，因為交投太靜。東亞唯一Call輪係9191，另外有隻籃子Call輪9251，昨日升幅72%，收6.7仙，組合好騎呢，係東亞加中信國際金融（183，前名中信嘉銀），月底夠鐘，溢價2.1%，槓桿率35倍，買賣都冇乜意義。
銀行股造好，搵銀行Call輪炒，相關正股離唔開滙豐（005）同中銀（2388），心水對象係近期提過嘅滙豐Call輪9545同中銀Call輪9462，前者波幅較大。
電訊股最醒係電盈（2906），收7.05元，升10仙。公司搞併股，目的明顯係想基金幫襯，想股價好，見1美金，機會存在。高溢價Call輪，雖然有好勁嘅槓桿率，但風險非常高，穩陣少少，揀9637，今年11月到期，現價20仙，溢價19.1%，槓桿率7.1倍。
章盛