小初舊年不時都有推介宏通集團（931），隻股主要分銷Intel產品。但好奇怪，隻股雖然有外資大行品題，但就成日都炒唔起，以往股價一去到0.80元至0.90元水平，就見到沽壓。
不過，宏通近排情況似乎有好大變化，一來係成交大咗好多，二來係股價屢見突破，搞到小初百思不得其解，於是向經紀陳打聽原因。經紀陳幾乎笑到噴飯，佢問小初係咪真係咁純情，莫非咁都唔知有人終於向現實低頭，搵咗個著名本地炒家幫手。
經紀陳又話，家陣唔係2000年科技股熱潮，就算宏通生意好轉，業績有機反彈，但冇炒家坐陣，又點會咁熱鬧？
宏通噚日又升8.7％，收0.75元，成交金額有621萬元。隻股又升近以往阻力位水平，小初問後市重有冇得升，經紀陳就話唔擔心，皆因呢班炒家，向來唔係短癮之流，短期股價或者會有回吐，但俾多些少時間，就會見到佢哋再出動。
慕容小初