上個星期立法會，朱幼麟發問時被特首取笑佢講嘢唔準，噚日就施政報告進行致謝辯論時，飛天朱似有向特首還以顏色嘅意味。佢好一本正經咁提醒各位局長，留心佢講嘅每一個字，因為對救港解困好重要。不過佢口音唔準，將特首真言「急市民所急」，講咗「拮市民所拮」，只好自嘲「連特首都有資格笑我！」咁又係嘅，滿口上海腔嘅阿董竟然笑人發音唔準，又難怪飛天朱唔順氣。
八方聽聞，阿董當日未答先笑，有啲議員覺得阿董失禮當幽默。事實上，政府嘅幽默感一向都捉錯用神，陳智思噚日就提醒大家，有個政府電視宣傳片，講一個酒樓清潔阿嬸大大聲話香港唔使向中央交稅，大家諗吓隔鄰嘅廣東人睇咗有乜感受？唔怪得最近粵港融合，廣東省對香港處處留難。
傳真︰2623-9278
電郵︰