XBOX機主朝思暮想嘅《DOA沙灘排球》一再延期，行貨終於鐵定港日美同步於2月18日推出，為咗將呢隻必Hit作品進一步推高，行貨不但推出連《DOA3》嘅XBOX套裝，而且重特別製作多款《DOA沙灘排球》精品，勢必成為Fans必儲之物。
記者：徐影龍
《DOA沙灘排球》已定於2月18日推出，香港有機會早幾日到貨，行貨除推出特惠套裝外，重印製咗一批《DOA沙灘排球》賀年揮春送畀機迷，呢張揮春抵死地方係個「球」字用立體製作，令人立即聯想Game內「波濤洶湧」嘅情況。呢批揮春數量認真有限，可惜代理重未決定用咩形式送畀機迷，不過《打機樂園》率先攞到五十套送畀讀者，詳情請留意下星期《打機樂園》嘅報道。另外據代理透露，重有另一樣特別精品，就係貼晒題嘅沙灘波一個，不過目前尚在設計當中，款式、數量及贈送方法均未定。
《DOA沙灘排球》可謂未出先轟動，一眾女角出名樣靚身材勁，今次將換上多款迷人比堅尼，喺沙灘上以排球較技。據報道《DOA沙灘排球》跟之前嘅《DOA3》有連動關係，所以今次行貨將推出XBOX特別套餐，除主機及手掣外，主要係包埋TECMO隻王牌Game《DOA3》喺入面，價錢則維持不變，賣$1,599，即係變相減價$300，不論係咪對嚟緊嘅《DOA沙灘排球》有興趣，都值得考慮入貨。