電訊盈科籌備農曆新年後賣嘅矚目新盤數碼港貝沙灣，噚日就同地產代理喺九龍灣展貿搞咗個大型講解會，將貝沙灣整體規劃圖曝光之餘，當然唔少得講吓代理最興奮嘅酬勞費啦。
聽電盈基建主席李智康話，將會設立最多單數同促成最多金額獎項，若果喺開賣首月內，成個市場可以賣到四百四十八個單位，最多單數同最多金額嘅獎金各設八十一萬四千蚊，若由一個代理同時奪得兩項獎項，即個人單獨奪得一百六十二萬八嘅獎金，認真「和味」。
不過，若果一個月只係賣到二百四十八間，最多宗數同金額獎就各縮水至二十三萬八千蚊。
呢個來頭咁勁嘅新盤，噚日就吸引咗成八百名代理同高層到場，發展商講明代理要考試及格至可以有資格促銷個盤，下個禮拜三就舉行考試。發展商就派發物業資料，重話個盤勝過當年嘅禮頓山，實用率高達八成四，樓底高十四呎九吋。
向來裝修示範單位都好有心思嘅信和集團，喺屯門市廣場搭建嘅元朗帝庭居售樓廠同示範單位，今次非常有新意。
個盤係低密度住宅，屬小品式項目，信和就用法國式庭園嚟包裝個樓盤。用咗成千萬搭建個七千呎售樓處，為凸顯物業別致嘅外牆，同頂層連天台嘅空中花園，就搭咗個兩層高外牆示範單位，二樓單位有雕花欄杆露台，地下就有私家花園做參考，不過，有樣嘢千祈唔好誤會，就係可以參觀嘅內櫳只得一層，二樓嘅外觀，只係搭出嚟畀人參考。真係佩服信和夠諗頭又細心。
中原地產噚日舉行精英會迎新大會，剛卸任嘅會長陳雁樓，講出呢個由員工自發組織嘅精英會所面對嘅問題，好似係會員經常缺席會議，唔夠投入（為咗應酬上司至出席）、少咗董事總經理黃偉雄出席，開會時間短咗好多等。咁新任會長李子明就要諗計點解決嘞。同時，集團主席施永青提議喺公司內聯網加入精英會會員嘅電話，等會員更加投入之餘，第日做deal時都有啲着數。佢又強調，除咗做善事之餘，重要令會員可以得益就最好。施生又話，雖然會員做善事值得鼓勵，但佢個人就覺得多咗啲。唔知係咪施生意識到今年樓市唔多好，希望員工花多啲時間同心機去搵生意。
中環國際金融中心二期錄得低租個案，對尖沙嘴區寫字樓租市未構成影響。屋之島董事總經理黃志強對蘭西講，呢兩個禮拜，尖東華懋廣場租出兩萬呎樓面，呎租十四蚊，五千呎以上單位，免租期五至六個月，五千呎以下就四至五個月。
點解華懋廣場咁好租？黃志強話因為實用率有八成咁高，管理質素又改善咗，但管理費係同區最平，三蚊呎；而且同區供應不多。
另外，大業主嘅效率提高咗，洽商時間縮短好多，遇着好客，重肯收平啲；重有一個好重要嘅原因，係畀佣快手咗，咁啲代理梗係盡力推介啦。
新地雷霆似乎對近排頻頻見報嘅數碼港貝沙灣好有興趣，噚日喺何文田山1號嘅飯局上，多次旁敲側擊，向記者索料。例如問記者點應付佢哋咁頻密嘅發布會，係咪逢請必到，又問記者有無去噚朝嘅誓師會，咁八卦嘅舉動唔似雷生一向嘅作風。佢成日話唔使理人哋點搞，自己個盤掂就得，就算對住競爭重大嘅畢架山1號，都無咁着緊，反而對個無雷公咁遠嘅貝沙灣就咁肉緊。
八卦完人哋嘅嘢，雷生竟然自爆身世，「雷霆」個名係人都讚夠威又夠響，點知原來係求其改，雷霆阿爺子孫過百，個個以單字取名，排第九嘅雷父，當年同大仔即係雷霆改名嗰陣，發現啲好聽嘅名畀班叔姪改晒，又唔可以重複，𢱑晒頭唔知點改好，於是隨口嗡就叫雷霆啦。咁都改到個咁架勢嘅名，雷霆話自己同仔女改名就更加苦惱。
蘭西
電郵地址：
