響剛過去嘅北美國際車展上，日產展出咗一部全新MPV—Quest；此車不但造型突出外，實用車廂布局及一台運轉寧靜順滑嘅3.5公升V6引擎，亦成為賣點之一。不如今日就趁新車響今年夏季推出前，一齊嚟先睹為快啦！
記者：鄭達基
快將於今年夏季正式推出嘅新款日產Quest，賣相圓渾吸引之餘，車頭重裝上設計獨特嘅鬼面罩及低斜頭燈組合，望落更具有一份吸引力，另外敞大雙趟門組合，亦方便乘客上落車呢！
與其他MPV一樣，Quest嘅車廂布局亦以靈活多變為賣點，除中排座椅能前後移動，方便後排乘客進出車廂外，中後排更可收摺放平，以增加尾廂載物容量；除此之外，中後排車頂更設有冷氣送風口及閱讀燈，而兩部設於中央嘅電視屏幕，更可接駁DVD影碟機播放電影，從而令長途旅程變得不再沉悶。當然唔少得重有高級音響、原廠冷氣及Skyview嘅玻璃車頂設計啦！而車上多個安全氣袋及充氣簾幕組合，亦可保障乘客安全㗎！
以美國地區為主要市場嘅日產Quest，將會以一台VQ系列嘅3.5公升V6DOHC引擎作動力核心，馬力輸出超過230匹，而扭力輸出更超逾32.5kgm，配以附有Overdrive嘅4前速或5前速自動波箱，從而令其有出色性能表現；然而，由多連桿所組成嘅懸掛系統，加上有多套電子系統如TDC及VSC等等嘅輔助，循迹性之高亦能予人有莫大信心呢！