呢個世界，好多時唔係你搵我着數，就係我佔你便宜，前英格蘭國腳加斯居尼最近就同中國甲A球會遼寧波導戰鬥隊，為大家演活呢種有趣關係嘞！
好多球迷都知道，加斯居尼年紀唔細，今季更加一直無班落。雖然佢仍堅持唔掛靴，不過佢嘅狀態睇嚟真係唔掂，之前話去美國踢波都冇人要，就連英格蘭嘅低組別球隊都唔吼佢，目前能力可想而知。
冤豬頭都有盟鼻菩薩，最近中國甲A球會遼寧波導戰鬥隊，就願意為佢提供年薪有五十萬英鎊（約六百二十五萬港元）嘅合約，邀請佢加盟。咁蝕底都肯制？無他嘅，能夠簽到呢位英格蘭一代球星，球會名氣肯定大增，贊助商咪當做廣告費囉！至於加斯居尼，重想要求佢畀到乜大家睇呢？收咗錢印印腳，踢得一日得一日囉！
姚明早幾日喺明星賽投票依然佔據西岸中鋒第一位，好多人以為佢背後有龐大嘅中國球迷支持係得票多嘅主因；但NBA聯盟公關部立即澄清，指官方網站追蹤票源後，發現大部份選票來自美國本土。我求大俠認為聯盟出嚟講嘢係多餘，既然網上投票係全球公開，啲票嚟自中國又點？使乜解釋咁多！
同人唔同命，兩位中國球員，邵佳一就正式以借用身份加盟德甲慕尼黑1860，嚟緊會着住件「33」號大冧把球衣比賽；而將會轉投荷甲飛燕諾嘅年輕射手曲波，響日前代表國奧上陣時被埃及對手踢到左腳腳踝骨裂，轉會事情隨時觸礁！希望曲波唔好灰心，當年雲尼斯達羅準備轉會曼聯之前亦斷過腳，最後都能夠加盟「紅魔鬼」，𠵱家發展重好好㖭。
德甲球隊柏林哈化嘅荷蘭籍教練史堤芬斯，最近要求隊中所有球員以德文交流溝通，咁做係希望當中多達十六個嘅外援球員，可以同其他德國球員打成一片。佢重以身作則，率先練好自己嘅德文㖭；我求大俠都認為做大嘅對下屬有要求，就要先做好自己本份，史堤芬斯此舉確抵讚！
有讀者打電話嚟問，點解晨曦哥連斯喺聯賽盃同南華陳豪文講手唔使停賽，而陳豪文又要停兩場；我求大俠都忘記咗呢單嘢，即刻查個究竟，原來紀律小組睇番帶後話哥連斯冇郁手，所以唔使停；但足總事後完全冇公布，亦冇解釋，實行閂埋門自己搞掂。足總改革後，講到會好公平公正公開，呢單嘢又點解話呢？
逢周一至周五見報