重有兩個禮拜唔夠就到農曆新年，例牌節目不外係去親戚屋企拜吓年，經過早輪聖誕、元旦的通宵狂歡，如果閣下重維持一副殘樣示眾，分分鐘細妹都俾人錯認做家姐。趁住今日起有護膚品開倉特賣，係時候要為肌膚進行急救，王牌貨品有勁爆價$29一支的Neutrogena毛孔細緻精華霜，絕對平冠全港九。至於其他超過一千種貨品，話明超筍價，咁就梗係大平賣，由我講可能都無乜說服力，不如就等旺角街頭一班姊妹，以專業用家角度，試用後再估吓有幾平！
記者：尹珊珊 攝影：陳穎
ImageGirl：MayMay
Neutrogena毛孔細緻精華霜(右)
Neutrogena毛孔細緻面膜(左)
任憑你皮膚幾咁白滑，如果近睇俾人發現毛孔又大又粗，一樣會大打折扣。呢隻毛孔細緻精華霜，內含能深入皮膚表皮，改善粗糙毛孔的Retinol，以及能去除老化角質和改善暗啞的AHA成份，唔單止可以在1個月內緊緻毛孔，重有效刺激骨膠原生長，用埋同系列的毛孔細緻面膜，效果自然事半功倍。平時單買一支不二價為$169.9，𠵱家加埋一套都不過係$78，經格價後保證平勻全港九。
ShiseidoVitalPerfection護膚系列
全面出擊。呢套由資生堂VitalPerfection出品的補水系列，包括有能夠迅速修護面部皮膚細胞，加強活性量的水份滋潤乳霜，既保濕滋潤，又有效防止肌膚老化現象的深層水份滋潤面霜，以及有助平衡肌膚組織的平衡水份收縮水，買齊一套都唔使三百蚊，平時買支名牌潤膚霜都唔止呢個價啦！
容量：400ml
原價：$450-$680
開倉價：每支$99
ClarinsExfoliatingBodyScrub
唔好以為面子見得吓人，咁就叫做足全套護膚過程，其實細微如身體每寸肌膚，都好需要長期護理，好似呢隻由法國老字號護膚品牌出品的BodyScrub，就係為全身而設的磨砂膏，只要沖涼後落少少摩擦全身，再用清水洗淨，每星期使用2至3次，咁就可以防止毛孔阻塞，去除死皮，令到皮膚輕輕鬆鬆咁呼吸。
容量：200ml
原價：$250
開倉價：$75
Janye(文員)估價：「平時都有用開類似的產品，因為背脊好易生暗瘡，怕第日着露背裝唔好睇，不過呢隻牌子本身都幾貴，我估開倉要$150左右。」
反應：「比雜嘜牌子重要抵，而且又夠晒大支，唔使慳住用，買得過。」
ShiseidoBenefianceHandRevitalizer
Benefiance是資生堂其中一個專為成熟女性而設的系列，熱賣產品包括有呢支特效護手霜，含有特效滋潤的配方，有效地深入及保護手部肌膚，具高度滋潤性，滲透力高又唔會過份油膩，同時有助軟化乾燥死皮，令雙手回復柔軟彈性，大大支有成200ml，足夠你成個冬天使用。
容量：200ml
原價：$420
開倉價：$99
Cherry(學生)估價：「呢隻HandCream質地好似好稀，但原來都幾油潤，咁大支應該唔平，原價都要成四百幾蚊，我諗就算開倉都要二百蚊啦！」
反應：「比我想像中平好多喎！不過有無過期先，等我考慮吓先啦！」
CliniqueActiveWhiteLabFormulaEssence
面上有早年遺留下來的紅印、暗瘡印，的確非常礙眼，平時惟有用化妝品稍為掩藏，但要治本的話，可以選用Clinique呢支亮澤美白精華素，早晚搽少少於面部和頸部，有助預防及減退色素，使膚色更加細緻均勻，重現光澤，最特別是精華素的質地異常輕柔清爽，搽勻後有種滑不留手的感覺。
容量：30ml
原價：$390
開倉價：$195
阿Milk(學生)估價：「起碼$150，應該無走雞。」
反應：「都算平，但係開倉價梗係愈平愈好，我估重有得減。」
CliniqueTurnaroundCream
Clinique一向多OL和成熟女性捧場客，除了一般的潔膚用品，呢支更生活膚霜也是較受人追捧的護膚品之一，佢含有水楊酸成份，幫助及加速新陳代謝，有持續修護作用，長期使用能令肌膚變得幼滑光亮，令肌膚有如重生一樣。
容量：50ml
原價：$300
開倉價：$150
Queenie(學生)估價：「我以前曾經陪朋友買過，四年前都要買成幾百蚊，我諗𠵱家平極都起碼要二百。」
反應：「半價都抵喎！不過我好少用呢隻牌子的護膚品，如果其他牌子都有咁抵，會考慮約埋班friends去掃貨。」
~H2O+IntensiveNightRepairSupplement(右)
~H2O+IntensiveMoistureComplex(左)
要嚴格進行護膚大計，便要因應日與夜不同需要，選用唔同類型的護膚品。呢兩支由極受少女鍾愛的護膚品牌~H2O+出品的潤膚品，有適合日頭使用的防曬日霜SPF15，佢唔單止保護皮膚免受紫外光和陽光的傷害，重可以收緊皮膚及增強肌膚彈性，增加細胞更生速度，同時產生滋潤和修護作用。至於夜晚使用的加強型晚間精華素，則有助改善皮膚自然復原過程，促進細胞更生，恢復彈性及補充失去水份。
阿貞(學生)估價：「你咁樣問一定有蠱惑，實係好平啦！我估呢支防曬日霜唔使$150，約莫百二蚊左右，不過我都係撞吓咋！」
反應：「全日唯一答中的估價專員，呢頭猛話答案係靠撞，嗰頭已經即刻抄抵開倉地址，醒！」
護膚品開倉特賣場
地址：觀塘觀塘道396號毅力工業中心9樓C室(牛頭角地鐵站A出口)
電話：21918767、21918243
開倉日期：即日至1月26日
開倉時間：中午12時至下午8時
付款方法：只收現金