二人組合Twins自從舊年農曆年出咗首《孖寶668》賀年歌，大收旺場之後，Twins上年全年成績都好好，幫公司賺大錢，人氣比以前更旺。Twins嘅唱片公司英皇視佢哋為賀年「吉祥物」，今年又嚟多首賀年歌《你最紅》。Twins上年拍賀年歌MV，以阿Sa蔡卓妍女扮男裝搞笑為主，今年佢哋用七位數字拍《你最紅》MV，重請國際級巨星一齊拍，不過佢哋就唔肯公開個巨星嘅身份，玩神秘。
除咗玩神秘之外，阿Sa同阿嬌鍾欣桐拍宣傳硬照時着住件tubedress影相，平時好少見佢哋着咁少，今次實行玩性感。而佢哋隻新碟重會送賀年揮春、海報、迪士尼富貴貓、利是封同賀年糖，送嗰啲揮春，重印住「嬌啲啲，讀贏好成績」、「SaSa滾，有錢齊齊搵」同埋「大吉大利，笑到碌地」等得意嘅恭賀說話。
陳煒噚日喺銅鑼灣幫歐日汽車行拍攝硬照廣告，陳煒呢個汽車代言人合約為期一年，酬勞都有成六位數字。唔講唔知，原來陳煒係冇車牌嘅，問佢有冇打算考番個車牌，佢話：「我都想快啲考番個牌。」
梁思浩之前喺灣仔開咗兩間私房菜餐廳，三月又會喺尖沙嘴開第三間分店，陳思慧主持嘅飲食節目《RoadShow》，噚日就特登去做介紹。梁思浩話因為之前發生咗件不愉快事件，佢先會靜落嚟諗下自己嘅未來，於是一年前喺灣仔開兩間餐廳，第二間喺一年內回本，肥姐沈殿霞都有包場幫襯，梁思浩話：「我要好多謝引起不愉快事件嘅人，令我努力工作，我會以德報怨，要爭氣。」
馮寶寶噚日喺亞視出席《萬家燈火》嘅宣傳，特別着咗套戲服，重孭住個小朋友出現。佢話拍呢套劇咁耐，好彩佢老公一直留喺香港陪佢，都算係佢嘅精神支柱。提到農曆新年馮寶寶話會留番喺香港過，因為佢重有劇拍，不過新年之前就會返一返大馬為佢九十歲嘅契爺賀壽。
汪明荃（阿姐）噚日接受商台電話訪問時，主持人問佢對於余文樂同陳冠希嘅不和新聞有乜嘢忠告，阿姐話：「佢哋兩個都係我好鍾意嘅新人，又靚仔又唱得，不過公眾人物要自我控制，唔可以恃後生就唔珍惜，會好快玩完。大家握吓手做番朋友，女朋友大把，隨緣啦！」阿姐重主動叫佢哋去睇自己做大戲。
