咖喱對一般人的定義是香料，配飯的無敵之選；再深層的是有藥用價值，能驅寒去濕。不過對於丘太而言，卻是她幸福的泉源，更是她和丈夫愛情的證明。對於現在的丘太而言，她希望將自己愛心咖喱宣揚開去，人人都可以感受她夫婦愛情的見證。
記者：陳冰麗
攝影：陳陶鈞、周旭文
「老婆個樣唔似泰國人，佢畀我嘅第一個印象係好清純。相處幾星期後，發覺佢嘅優點更多，賢良淑德又慳儉。拍拖嗰時只會逛吓街食吓飯，但係出街食得多，老婆覺得又貴又唔值，於是佢決定親自下廚，竟然發現佢煮得一手好咖喱，因為食佢嘅咖喱食上癮，再食街外嘅咖喱就覺得唔及佢煮嘅好味，當時心諗一世食佢煮嘅咖喱都願意，於是決定向佢求婚囉！」
丘太是泰國華僑，但講得一口流利廣東話，為人健談之餘待人又誠懇，她說自己來香港純粹只為打工，無想到竟會喺香港落地生根，丘太帶着甜蜜的笑容話：
「我同老公其實係同事關係，我一直有留意到佢，只係佢無發覺我嘅存在啫！佢畀我印象係怕醜仔一名，喺一次機緣巧合之下，透過朋友嘅介紹我至認識到佢，覺得佢幾老實，印象又唔錯，所以好快開始拍拖、結婚。」
問到她如何用咖喱俘虜老公呢？她笑着說：
「我煮嘅咖喱只係以前喺娘家煮開，唔敢誇口係啲咩秘方，可能煮畀佢食時特別有心機、落足料啩！」
估不到咖喱背後的秘密是足料同埋有心機，愛情的魔力果然驚人。
兩年前丘生及丘太做開的泰菜館因為僱主裁員而導致兩個齊齊失業，幸好他們在太平時有儲錢習慣，儲落些微積蓄亦足以達成他們多年夢想，就是自己開舖。丘太謙虛地說：
「我哋其實一直都想開間屬於自己嘅食店，只係因為時間上唔配合，咁啱大家失業，咪試試搞，我老公又入廚超過三十年，善於煮西餐，而我煮泰國菜又過得去，見荃灣區平價泰國菜唔多，所以就決定做泰菜。」
以平價泰菜為主的「泰好味」，開業短短三個月，已客似雲來。據丘太透露，幫襯的大部份是鍾意她煮的咖喱，熟客仔甚至要求有外賣。丘太雖然來自泰國，但所屬家鄉因為飲食習慣不嗜太辣或太甜，所以這裏出產的都是較溫和風味的泰菜。
丘太的秘製咖喱，除直接由泰國咖喱做「膽」之外，在烹調的過程中還會再另行「加工」，例如加入青檸葉、香葉、乾葱、蒜頭、南薑等多種香料去煮，難怪與其他泰國菜館味道相異。
青咖喱汁較稠身，是三種中最辣，但又是最香的一種，配以任何食物都惹味非常；黃咖喱最少辣，牛腩燜得夠腍；紅咖喱色澤雖然紅彤彤，但辣味亦不及青咖喱，汁是三種中較稀身的，這裏咖喱雞不但香，食落還會發覺好有雞味，因為丘太堅持要用鮮雞。
女婿蛋又稱泰國炸蛋，是泰國民間的家常料理，將蛋先烚熟，再放滾油中炸熟，剝去殼後配上以酸子、椰糖、洋葱絲、辣椒絲等調成，味道酸酸甜甜。
相傳此菜是從泰國中部農莊流傳出來的，當時的農家多招贅，男方入門後要到田裏幫忙，岳母就做炸蛋給女婿們吃，人們就將此蛋取名為「女婿蛋」，從此流傳至今。
以紅椒膏做成紅彤彤湯色，飲時實際非想像中咁辣，因為用了新鮮青檸汁，中和辣味，加埋鮮草菇、鮮蝦肉、芫荽等配料，整窩冬蔭功集酸、甜、香、辣味於一身，足四人份量。
泰好味
地址：荃灣香車街街市二樓熟食檔市場九號舖
電話：24928296
營業時間：11:00am-10:00pm