就嚟過年喇！女士們會唔會特別悉心打扮，穿着一啲中國傳統服飾去拜年呢？如果重未訂做，小記就帶大家去買現成，質料及手工一樣咁出色，包保各位女士們行出街夠晒搶鏡。
記者：梁煒健
全件紅彤彤以絹絲製成嘅棉褸，棉衫上嘅如意吉祥及梅花圖案，均以電腦刺繡上去；而其較有特色之處，就係衫領及喇叭形衫袖等處均有貂鼠毛，衫內則用上金色嘅絹料縫製，着佢上身特別有高貴大方之感。除咗有紅色，另有金色以作選擇。
售價：$239 尺碼：S至XXL
繡有一朵大牡丹花圖案於右下方嘅無袖棉背心，整件背心以全棉製成，所以幾冷都頂得順。另外，背心嘅領、袖及衫邊均以兔毛圍邊，睇落十分美觀又溫暖，加上呢件背心只有白色較為YoungLook，所以較適合年輕嘅少婦穿着！
售價：$139
尺碼：S至XL
以黑色貂鼠毛圍領邊及衫袖嘅中國棉褸，由於係全絲棉縫製，感覺特別矜貴，而且着上身一定暖笠笠㖭！另外，其開衩式小喇叭款嘅衫袖，襯托埋整件衫繡有蝠鼠及桃花紋圖案，確係由少女至中年婦人都啱着。除咗有玫瑰色外，另有紫色及金色以供選擇。
售價：$259 尺碼：S至XL
整件長褸亦以絹絲製成，而其特別之處係佢選用中國式嘅企領，而全件褸開胸又冇鈕，兔毛縫製衫嘅衣領及袖口，睇落好有大宅門風範。棗紅色絹料，加上衫嘅前後均以人手繡上碎花圖案，只賣＄350一件十分抵買。
售價：$350
尺碼：S至XXL
加利亞時裝
電話：23379810
地址：九龍樂富樂富中心3樓T19A號舖