日本女優吉岡美穗同黑人格鬥家BobZapp早前喺電視劇《皇家雙妹嘜》入面，經常大打出手，搞出無數笑料。喺今年二月開始，吉岡同阿Bob重喺濱田雅功同拍檔松本人志手上，搶走咗Georgia咖啡嘅廣告合約，呢個美女與野獸嘅騎呢配搭，真係好受觀眾歡迎！
為咗拍攝新一輯Georgia咖啡嘅廣告，早排吉岡同阿Bob就喺街頭取景。喺個廣告裏面，導演仍然食住《皇家雙妹嘜》條水，安排吉岡以警花look亮相。
話說當賊人阿Bob出現嗰陣，吉岡即時飲啖咖啡醒神，最後成功將阿Bob捉拿歸案。佢兩個喺拍攝廣告期間，重引咗好多人圍觀㖭。
咪睇阿Bob外形睇起上嚟好兇狠，據吉岡講，查實阿Bob非常有紳士風度，唔怪得吉岡喺廣告中用手𢱑住阿Bob個胸嗰陣，重冧到唔捨得放！