睇上星期收到嘅《經濟學人》，第十七頁有一個招聘廣告，獵頭公司Heidrick&Struggles替英國倫敦大學書院（UniversityCollegeLondon，簡稱UCL）招聘校長（ProvostandPresident），廣告並冇聲明需要乜乜學位（你都可以申請），但就講到明需要高度管理及商業技巧（managementandbusinessskills），並且了解高等教育。
我哋自己知自己事，當然唔會毛遂自薦，儍到以為自己有資格，不過注意到UCL冇在廣告中強調申請人嘅學術地位、學術聲譽，只係（以香港人眼光）講庸俗啲嘅「管理及商業技巧」，你話奇唔奇怪呢？
其實人哋係打開天窗說亮話，費事假惺惺，UCL廣告話自己一年嘅turnover（一般譯做營業額）有四億五千萬鎊，一萬八千個學生，七千八百個職員，呢間「公司」又確係幾大，好需要一個強而有力嘅CEO，畀個諾貝爾獎科學家（或詩人）去UCL做校長，未必適合。
香港亦需要請校長，但我哋（外國傳媒報道甚詳）就比較講多啲學術，少講啲管理。國際一流人才肯唔肯嚟香港呢？唔係咁易㗎，最近左丁山睇到一封知名教授嘅電郵，佢婉拒獵頭公司提名，其中一項理由就係香港嘅leadership（任你點譯，點樣詮釋）令人唔安心。唉，香港唔安穩，世界上無人不知，估唔到學術界中人，亦視我哋嘅leadership為負面因素也。