曾經紅極一時帶起Mod友潮流嘅英國樂隊TheWho，雖然解散咗好耐，但最近樂隊結他手PeteTownshend因為瀏覽孌童網頁，再度成為新聞焦點，真係有啲似多年前米高積遜（MichaelJackson）涉嫌性侵犯小朋友咁轟動。
已經五十七歲嘅Pete，最近俾英國警方發現佢上過啲兒童色情網頁，噚日佢俾警方拘捕，帶返警署調查。經過八十分鐘嘅問話後，Pete獲准保釋外出，但暫時唔可以離開倫敦。外國傳媒一早收到風，齊齊拎相機狂影Pete，相信佢好耐都冇見過咁多記者。
外國傳媒重影到警方喺Pete屋企帶走大袋細袋證物，當中包括好多錄影帶，我大口羅拉好奇想知，入面有冇啲唔乾淨嘅嘢呢？Pete話自己部電腦嘅硬碟可以畀警方check吓，又承認有上過去啲網頁，不過堅稱自己冇孌童癖，只係為咗自己嘅自傳做資料搜集先上去見識，理由牽強咗啲喎！