大律師公會主席梁家傑前日喺法律年度開幕禮上狠批政府嘅不是，搞到律政司司長梁愛詩面都黑埋，即時亂晒陣腳。
不過，八方班老友就拍爛手掌，覺得香港重有得救，因為重有人肯講真話。而梁家傑嘅師兄李柱銘就更大讚好嘢。馬丁同八方講，自從特首請人大釋法之後，佢就冇再出席每年法律年開幕活動，因為怕會忍唔住起身下台離場。但係估唔到梁家傑呢個九龍華仁仔咁厲害，句句到肉，馬丁話如果佢喺現場，一定會起身，當然唔係走，而係帶頭拍掌。梁家傑發言後嘅說話更可圈可點，當今香江真係太多擦鞋仔，肯將一己所思所想同認為正確嘅說話講出嚟，唔怕得罪嘅人實在太少。首席法官李國能亦語帶雙關，識聽嘅亦知其絃外之音。梁司長，有咁嘅法律界同司法界代表，應該額手稱慶，何懼之有呢？
傳真︰2623-9278
電郵︰