此晚行經太古廣場Grappas門外，因此店以玻璃為間隔，一望就知道入面有無人客。咦，人客都算多，重見到田大少與滙豐艾大班分別在內進餐，田大少好似係同太太撐枱腳，舒舒服服食番一餐。
掛住望裏面，幾乎撞親人，哈，此人就係玩家C。玩家C最鍾意玩新意思，餐廳、會所、遊樂場、網站、遊戲機場、網吧，冚扮爛都有掂過，玩玩吓就識得轉移陣地，係商界不倒翁，真能人也。玩家C捉住左丁山：「Grappas入邊有靚女咩？猛咁望？」非也，非也，連忙解釋。玩家C見到田大少背影，有所感觸：「呀，不如托佢講一條好橋畀最高當局聽，點樣救生香港。」左丁山笑曰：「不如先講畀我聽。」玩家C講：「嗱，為咗避免生靈塗炭，唔好打仗，最好就請侯賽因離開伊拉克嚟香港做特首，侯賽因一上任，香港必定冇財赤，中環商廈冇空置單位，因為（一）冇公務員敢違抗侯賽因，必會自動減薪三成；（二）侯賽因嚟咗，美國FBＩ、CＩA、英國特務會以不同面孔湧嚟香港，租晒中環寫字樓，三來侯賽因會將金管局、政府總部搬晒去新蒲崗、觀塘啲空空如也嘅工廠大廈，慳番好多租金，四來……」唉吔，全部怪論，左丁山叫佢唔好再講。玩家C話：「喂，二十三條未通過，我重可以講餐飽㗎，既然paris-hongkong.com玩葉劉淑儀玩得咁過癮，我嘅建議重實際啦，何況侯賽因唔需要通過二十三條，佢自己就惡過二十三條啦！」