冬菇亭是香港公共屋邨的獨有產物，伴隨着許多香港人成長。禾輋邨陳根記老闆周先生靠接手大牌檔起家，二十年過去，他還未做到百萬富翁，全年除歲晚休兩、三日，其餘都是無間做，但總算發展到一舖變兩舖，還有一班好手足，尤其是方師傅，兩個人齊創新菜，成為禾輋邨大牌檔中嘅一哥。
記者：邵超 攝影：周旭文
接過陳根記的卡片，上面寫上「禾輋排檔老字號」，這檔老字號屹立禾輋二十一年，除鄰舖依舊，其他攤檔早已易手，其實陳根記的發展十分緩慢，二十年來才一步步捱出成績來。
「我做雲吞麵出身，接手後小炒反而愈做愈好，兼顧唔到雲吞麵，後來請咗方師傅幫手。當時炒小菜只有一個高速爐，無水喉，炒完一碟轉身踎低就要洗鑊。十年前開始炒唔切，慢慢逐個高速爐加落去，𠵱家數埋超過十二個爐。」
每個冬菇亭通常間有兩個攤檔，周先生一直沒想過可以一檔變兩檔。
「97年收到風隔籬打冷老闆唔做，至決定擴充，夥計可以兩邊走，唔使再請人。我特別揀七月一日開張，容易記。當時最好景，閒日七點至九點都要等位，排隊排到去電表房同廁所，單係空地就放咗十張枱。」
現時陳根記仍然是全場最旺的一檔，夜裏政府部門職員只會站在其附近，監視他們有沒有在冬菇亭範圍外擺枱做生意。
「以前陳根記每碟小菜年年加兩蚊，近幾年經濟轉壞，已經無加價，但人工就無減過。」
周先生亦曾雄心壯志承辦過中大飯堂，兩年合約滿了便不再續約，始終力不到不為財，保證不了質素，反而得失人客。此時香港經濟低迷，要保持日日旺場，一定要度橋。
「做咁耐要諗新嘢真係好難，可能我用一個月諗到新菜，人哋第二日即做即學，要諗到人哋學唔到嘅，又唔可以影響到小菜質素，於是諗到賣布甸。但同方師傅兩個諗新菜，大家有商有量，最終都會有個結果。」
周先生十分喜愛做運動，習慣每晚收工後跑步才安樂，因為幹大牌檔這一行，幾乎沒有休息的日子，只在歲晚休嗰三、兩日。
「人哋成功唔使點做，我自己就要做到隻狗咁。試過培養過管理人，但最終都要靠自己……日日返工，好少同三個仔見面，通常星期六、日見一次，習慣咗凌晨兩點同佢哋喺附近球場踢波。」
或者正如他所說「做呢行有講唔出嘅辛苦」，每日辛勞工作，因為他們都相信，明天會更好吧！
賣相口感似鰻魚
炒起糯米備用，鮮宰原條鱔，煎乾待皮脆，上枱前才再燒，淋上秘製醬汁，賣相和口感俱似鰻魚。
麵豉魚雲煲$45(下)
大家都很愛這碗以缽盛載的雞油飯或豬油飯，以上湯蒸過的飯特別芳香撲鼻，不少客人叫外賣也要連缽一齊送上，周先生為免損失，每個缽收按金十元，十分有趣。至於魚雲用蛋炸得甘香鬆脆，稍加麵豉調味已經十分美味。
因為是真材實料，故有「全真」之名。用清水熬烏雞和豬骨一小時，味道十分鮮甜，加入清水胡椒更惹味驅寒，點這個煲大多利用湯底打邊爐，因為可以一煲兩食。
陳根記
地址：沙田禾輋邨禾輋牌檔3-5號
電話：26061390
營業時間：5:00pm-1:30am