小初以前賺過錢嘅中海油田服務（2883），唔經唔覺股價又創新高。有基金盤做嘅經紀黃話，基本上隻股仍然係幾間美資行坐晒，所以局住炒上，同基本因素冇太大關係。隻股舊年11月，以每股1.68元招股上市，至今唔夠兩個月，股價有20%升幅，確實表現唔錯。
海油服務噚日又升1.25%，收2.025元，成交金額有成7469萬元，場面非常熱鬧。
經紀黃話，其實好多報告只係將隻股目標價定在2元水平，皆因佢生意掂唔掂，好依靠中海油（883）每年嘅資本性投入，但中海油已講明，今明兩年資本性開支可能會減省，對海油服務將有影響。
不過，炒股有時主要講供求，幫海油服務上市嗰幾間美資大行，在隻股上市後，喺1.70至1.80元水平收集好多貨，今次升浪其實係純炒供求，同基本因素無關，所以現時股價雖已達到好多大行目標價，但日後繼續升則一啲唔出奇。
慕容小初