班局長噚日繼續為阿董份施政報告解畫，召開「施政綱領」記者會，葉劉淑儀﹙圖﹚果然不愧係阿董最忠心部下，一身鮮橙色外套同樽領毛衣，同份橙色施政報告襯到絕。葉太下半身更精采，係一條啡色百褶短裙。呢一身「殺死人」嘅裝束，加上見神殺神、遇佛殺佛嘅氣燄，令葉劉殺氣十足。
有記者問到出唔出白紙草案，葉劉今次又有新猷，叫位男記者得閒上去佢辦公室，畀佢睇番過去報道二十三條時，多份「唔客觀」嘅錯誤報道，引證佢阿姐冇屈人。
葉劉對英文繙譯更毫不畀面，出到聲話唔夠準確，但慶幸有機會用英文答，真係慌死人唔知佢英文了得。講到煽動性刊物，葉劉又借機話自己睇過好多書，不過佢嘅涵養，有冇因為博覽群書而提升，大家有眼見啦。
傳真︰2623-9278
電郵︰