噚日「施政綱領」記者會，政制事務局局長林瑞麟無厘頭變咗「搭嘴攝石人」。佢老哥先講咗一大段選舉如何可以創造就業，實行撈埋葉澍堃嗰瓣。但係講到佢政策範圍內最重要嘅議題，○七年嘅政制檢討進度，即係幾時先有全民直選，就只係簡單講幾句「非常重要」、「非常重視」就蒙混過關。
不過那邊廂葉劉答二十三條講到興起時，梁愛詩都未嚟得切開口，林D8竟然幾次爬詩姐頭，加把口話要補充，滔滔不絕咁講咗幾分鐘。
據佢老哥解釋，原來批評二十三條立法，影響到「一國兩制」嘅形象，所以佢一定要出聲。不過講講吓再有記者問佢，政制事務局負責嘅檢討問責制半年來成效嘅報告書，幾時先有得睇，同埋政制檢討嘅事，健談嘅林局長又變返惜字如金。
傳真︰2623-9278
電郵︰