一直以為返深圳Shopping係師奶嘅專利，點知部門內其中一位攝影師，居然亦好此道。每次返深圳都買個不亦樂乎，不過所買的並非棉被、窗簾，而是國產攝影器材。除了專業的攝影師外，連我身旁那些攝影發燒友又或是攝影初哥，亦愛組隊北上買器材，究竟國產器材有乜咁正？今次一於邀請經常北上買器材的攝影師Alex，帶大家睇睇佢嘅心水推介。
記者：歐嘉荃 攝影：韋信
Alex小檔案
已有3年攝影經驗的Alex，從小已喜歡拍攝，自於職訓局的攝影課程畢業後，便任職過香港多本雜誌及報章的攝影師。他現時使用的影樓燈、柔光箱等器材均在內地購買。
每次返深圳工作，Alex總會嚟呢間店舖朝聖，佢話呢度由國產相機到進口機都有，不過進口機價錢較香港貴，所以唔會喺度買，國產機就夠晒平而且款式多，負責人呂先生話約有一成港客光顧，每次都會花費?700至?1,000咁多！
呢部有中國Leica之稱的鳳凰機，純銀包啡皮的機殼靚到不得了，Alex一摸上手就即刻想據為己有。相機備有電子測光，對焦則使用連動對焦，呂先生話部機操作方便，最啱初學者使用。
型號：鳳凰205E
鏡頭：50mm/F2.8
售價：?480
Alex評價：幾百蚊好抵
部機好靚仔，觀景器好清，對焦時叠象啱啱對正，幾百蚊真係抵。
呢部鳳凰牌的單鏡反光機，配有28-135mm鏡頭，功能有多次曝光、同步輸出插孔、自拍、景深預測等，不過最令人驚喜係有埋指南針，一般外國機好少見。
型號：鳳凰DC303KW
鏡頭：50mm/F1.7
售價：?1,680
Alex評價：部機好搞鬼
最啱喺戶外影日落，可以睇啱方位Set好位置等日落。功能唔錯，鏡頭有埋Marco，可以影到好近的物件。
講到國產機點可以唔提海鷗呢個經典品牌呢？呂先生話海鷗機的銷量一向唔錯，質素亦有保證，好似呢部單鏡反光機，外形無鳳凰咁鈍，有齊電子快門、自動曝光、電子自拍、景深預測按鈕等，重配有28-70mm的鏡頭，比日本機亦毫不遜色。
型號：海鷗DF-400G
鏡頭：50mm/F1.8
售價：?1,550
Alex評價：對焦屏較暗
Zoom得較硬，有Marco功能可影到大約0.4m以內的物件，不過對焦屏較暗，我認為鳳凰DC303KW好用啲！
店內有二手器材售賣，呂先生話：「我哋歡迎顧客將攝影器材放在這裏寄賣，唔想寄賣的話，亦可賣斷畀我哋，好多顧客都會喺呢度執到筍貨。」言猶在耳，Alex就睇中呢部Hasselblad相機，「呢部120菲林的相機好新淨，最衰部機賣成萬幾蚊咁貴！」據呂先生講部機係個客放喺度寄賣，九成半新重連埋Packing，呢啲筍貨最多人要。
中軻照相器材專業店
地址：深圳市深南東路日華賓館一樓4010號
電話：（86）75525580116
17mm廣角鏡?1,000有找
外國的攝影器材質素當然好，不過價錢就的確幾貴，好似一個17mm的廣角鏡，都要賣成港幣$3,000。呢度可以配番個海鷗鏡頭，好似呢個17mm的定焦廣角鏡，只需?950，的確吸引，不過鏡頭屬於PK接環，只適用於賓得及Ricoh的機身。
Alex評價：最衰唔啱Nikon機
咁Wide嘅鏡頭的確抵買，不過唔啱Nikon機，對於我嚟講，幾平都無用。
雖然香港嘅菲林十幾蚊就有一筒，不過某些國產菲林真係好抵用，好似呢款國產的桑尼彩色菲林，有200度同100度，36張都只不過?10，的確抵！
菲林夠平
本地人蔣小姐：「我好鍾意影相，好多時都會喺度買菲林，好似桑尼的菲林就夠晒平，而且顏色都好靚！」
盈新盈照相器材
地址：深圳市寶安南路2013號
電話：（86）75525563432
呢個係Alex一見傾心的防潮篋，負責人周小姐話：「全個篋用了具抗擊度高的塑膠材料做成，配上篋邊的彈性發泡橡膠條，即使跌落水都唔怕入水，入面重有防震海綿，可穩固器材，連軍隊都係用佢放儀器。」Alex話外國都有呢啲防潮篋，不過要成二千幾蚊，呢個售價非常經濟。
若果貪輕便的話，我就建議各位買呢款防潮箱，呢款膠箱除咗夠密實外，箱面重有濕度顯示，濕度幾多都可一清二楚。
價錢唔算平
本地人榮小姐：「我屋企都有幾個輕便防潮箱，我覺得呢間店啲箱好齊全，不過價錢就唔算好平！」
萬得福防潮器材專賣店
地址：深圳市深南東路
4006號日華賓館一樓
電話：（86）75525576488