港府對證券界承認面對管治危機，希望落實解決財赤來重建市民信心。不過，係人都知除非天降黃金，或者地下噴出石油，否則以加稅及減公共開支解決財赤，難免引起民怨。港府現時如何安撫民心都成問題，重講乜嘢重建信心呢！
ｉ師傅話，近排發覺大陸官員好有魅力，除朱總之外，連廣東省省長盧瑞華、計委主任黃偉鴻都表現不俗，前者眼光遠大（要將廣州發展為金融中心），後者務實（要建港澳珠大橋先要有投資者），比一廂情願大談大珠三角融合嘅香港高官優勝。ｉ師傅重話，本港施政報告其實漏咗一項，就係要輸入治港專才。阿虎真係無言以對，惟有長歎三聲。
港股噚日反覆下跌37點，收報9796，成交63.92億元，開始有縮減現象，中資股亦出現回吐，炒風應告一段落。雖然有資金追落後捧三四線股，但成交並不活躍，相信難成氣候。
民信集團（547）傳出賣盤消息，大股東擬將19.26%股權售予e-Compact，每股作價高達0.05元，較停牌前報價0.026元有溢價近倍。呢單deal本屬利好消息，但消息曝光後，股價噚日竟一度下挫逾40%，低見0.015元。
黑客話，由於交易不涉全購，市場又傳出新股東可能會以供股手段，來獲得民信控制性股權，加上有人想藉好消息出貨，但又缺乏承接，當然會導致股價急挫。由於單deal尚未完成，臨尾亦有買盤入市維持秩序，最後收0.024元，跌7.7%。目前咁嘅時勢，三四線股股權易手，未必一定係好事。
德興（611）最近傳出有人斟買殼，股價曾大升，但近日回軟，噚日更大跌24%，收報0.27元。據聞買方出價好低，根本冇得傾。
阿虎