瑪利亞（肥媽）、張學潤（Nelson）同黃秋生等，前晚喺尖沙嘴文化中心演出「肥媽好友慈善演唱會」。
肥媽、黃毓民同Nelson前晚喺台上大玩棟篤笑，佢哋勁寸特首夫人董趙洪娉早前喺節日後執垃圾一事，黃毓民更暗指董太係失敗男人前面嘅女人。
肥媽亦不甘示弱，勁寸麥浚龍（Juno），佢話：「黑掹掹係炭爐，烏糟邋遢嘅係多屎爐，唔好樣係叫乜嘢爐？」銀幕上即刻打出Juno嘅相。黃毓民話：「麥紹棠坐咗喺嗰度。」肥媽又話：「我都話佢叻仔。」佢哋又寸陳冠希同余文樂爭鍾欣桐，不如複製多幾個，咁咪唔使爭囉！
此外，李惠敏嘅男友前晚亦去捧場，但佢就好避忌唔想提，李惠敏話：「我好開心，但一切順其自然。」而巫啟賢又單打時下藝人「健康」，佢抵死咁話：「就係因為健康先有力氣打交。」
李彩樺噚日喺九龍城環球嘉年華出席義賣活動同簽名會，佢話遲啲一定會約埋成班朋友一齊去嘉年華度玩機動遊戲。問李彩樺會唔會約埋緋聞男友方力申，佢好大方咁話：「都好呀！佢有時間咪一齊嚟囉。」原來李彩樺希望第時結婚可以同老公玩笨豬跳舉行婚禮，唔知緋聞男友方力申有冇膽量去娶佢呢？
湯寶如前晚喺大埔拍攝港台劇集《女人多自在》，佢話近排同朋友合資開咗間美容院，重會親自做代言人，以性感打扮拍攝廣告。
湯寶如話：「呢次係我入行以嚟第一次做生意，我都好緊張，本來想開茶餐廳，但因為成本好大，所以最後就決定入股朋友嘅美容院。」
林憶蓮噚日喺台灣出席唱片記者會，已經好耐冇同老公李宗盛合作嘅憶蓮，專輯裏面嘅歌曲《最好的事》就由李宗盛填詞。憶蓮話因為壓力太大，所以好少同老公合作，不過憶蓮𠵱家最想同陶喆合作。
早前不時有傳聞話憶蓮婚姻出現危機，但係原來佢哋兩公婆依然非常恩愛，憶蓮早排去上海時，就不時同老公手牽手出現，證明兩人嘅感情未變。
何韻詩噚日同黃耀明喺銅鑼灣出席音樂劇《戀人論語》記者會，阿詩話第一次做音樂劇，就要用抽象手法去演繹，搞到佢有啲擔心，不過阿詩都希望觀眾到時能用心去理解。
阿詩話：「今次好開心有黃耀明做音樂，我可以集中精神唱歌同跳舞。」對於今次全女班演出，阿詩就話信心十足。
張藝謀導演早幾日去咗韓國宣傳電影《英雄》，有韓國報章話張藝謀喺韓國同女星金喜善會面，商討合作拍片嘅事。據講張藝謀今次去韓國，金喜善重揸住架私伙Benz去機場接張導演機㖭。韓國報章又話金喜善噚晚出席完《英雄》首映後，會同張藝謀食飯密斟，金喜善嘅經理人就已經證實咗會有呢件事。
